ٹک ٹاک، جو عام طور پر ایک ویڈیو شیئرنگ ایپ کے طور پر جانی جاتی ہے، اب واٹس ایپ کے مقابلے میں آنے کے لیے تیار ہے۔
جی ہاں، دنیا کی مقبول ترین میسجنگ ایپ کو اب ٹک ٹاک کے نئے فیچرز کی صورت میں ایک نئے حریف کا سامنا ہو سکتا ہے۔
ٹک ٹاک نے حال ہی میں میسجنگ کے حوالے سے دو بڑی اپ ڈیٹس، گروپ چیٹس اور اسٹیکرز، متعارف کرانے کا اعلان کیا ہے۔
ابھی تک ٹک ٹاک پر صرف ون آن ون میسجنگ ممکن تھی، لیکن اب اسے گروپ چیٹس کے لیے بھی استعمال کیا جا سکے گا۔
کمپنی کے مطابق، صارفین اب ٹک ٹاک پر گروپس بنا سکیں گے اور ہر گروپ چیٹ میں 32 افراد کو شامل کیا جا سکے گا۔ گروپ کے تمام افراد ایک دوسرے کے ساتھ چیٹ کرنے، ویڈیوز شیئر کرنے اور ان ویڈیوز پر کمنٹس کرنے کی صلاحیت رکھیں گے۔
البتہ، 13 سے 15 سال کی عمر کے صارفین کے لیے گروپ چیٹس کا فیچر دستیاب نہیں ہوگا، جبکہ 16 سے 17 سال کے نوجوان گروپ چیٹس کا فیچر استعمال کر سکیں گے مگر انہیں کچھ پابندیوں کا سامنا ہوگا۔
اس عمر کے صارفین کو صرف ان کے دوست ہی گروپ چیٹ میں شامل کر سکیں گے، یعنی دونوں کا ایک دوسرے کو فالو کرنا ضروری ہوگا۔ اگر کسی نوجوان کو گروپ چیٹ میں شامل ہونے کا لنک بھیجا جائے گا، تو وہ اس وقت تک گروپ کا حصہ نہیں بن سکے گا جب تک اس میں اس کا کوئی دوست شامل نہ ہو۔
ٹک ٹاک نے صارفین کو زیادہ کنٹرول دینے کے لیے چیٹ گروپس میں موجود تمام افراد کو میوٹ اور بلاک کرنے کے ٹولز تک رسائی فراہم کی ہے، اور ساتھ ہی پلیٹ فارم کی پالیسیوں کی خلاف ورزی پر کسی بھی فرد یا پورے گروپ کے خلاف رپورٹ کرنے کا آپشن بھی دیا ہے۔
اسی طرح، ٹک ٹاک نے ڈائریکٹ میسجز کے لیے اسٹیکرز بھی متعارف کرائے ہیں۔ اب صارفین اپنے اسٹیکرز بنا کر دوسروں کے ساتھ شیئر کر سکیں گے یا اپنے پسندیدہ اسٹیکرز تلاش کر کے میسجز اور ویڈیوز میں استعمال کر سکیں گے۔
