بٹ خیلہ: پاکستان تحریک انصاف (پی ٹی آئی) کے صوبائی صدر جنید اکبر نے کہا ہے کہ پارٹی چیئرمین عمران خان کے حکم پر اسلام آباد میں بھی جلسہ کیا جا سکتا ہے۔
صوابی میں پی ٹی آئی کے جلسے کے تناظر میں گفتگو کرتے ہوئے جنید اکبر نے دعویٰ کیا کہ آج کا جلسہ تاریخی ثابت ہوگا اور عوام کی بڑی تعداد اس میں شریک ہو کر بانی پی ٹی آئی سے اپنی وابستگی کا اظہار کرے گی۔ انہوں نے کہا کہ یہ جلسہ نہ صرف خیبر پختونخوا بلکہ ملک کی سیاست پر بھی گہرے اثرات مرتب کرے گا۔
جنید اکبر نے مزید کہا کہ خیبر پختونخوا کے وزیراعلیٰ علی امین گنڈاپور بھی بڑے قافلے کے ہمراہ جلسہ گاہ پہنچیں گے۔ انہوں نے واضح کیا کہ پی ٹی آئی کا مینڈیٹ چرایا گیا ہے اور ہم اسے واپس لینے کے لیے ہر ممکن قدم اٹھائیں گے۔
انہوں نے یہ بھی کہا کہ جب بانی پی ٹی آئی حکم دیں گے تو پارٹی اسلام آباد میں بھی جلسہ کرے گی۔ ان کے مطابق، عوام کے حقیقی مینڈیٹ کے حصول کے لیے پی ٹی آئی اپنی سیاسی جدوجہد جاری رکھے گی اور ملک بھر میں جلسوں کے ذریعے اپنا پیغام عوام تک پہنچائے گی۔
پی ٹی آئی رہنما نے مزید کہا کہ کارکنوں میں جوش و خروش عروج پر ہے اور پارٹی کی قیادت کے اشارے پر وہ کسی بھی سطح پر احتجاج یا جلسہ کرنے کے لیے تیار ہیں۔
