یوٹیوب میں ایک نیا فیچر متعارف کرایا جا رہا ہے جو ایکس (ٹوئٹر) کے کمیونٹی نوٹس سے کافی مشابہت رکھتا ہے۔
9 ٹو 5 گوگل کی رپورٹ کے مطابق، یوٹیوب کے اس نئے فیچر کا مقصد ویڈیو شیئرنگ پلیٹ فارم پر گمراہ کن مواد کو روکنا ہے۔
اس فیچر کے ذریعے صارفین گمراہ کن یا مبہم ویڈیوز میں وضاحتی نوٹس شامل کر سکیں گے، جو ریویو پراسیس کے بعد ویڈیوز کے نیچے ظاہر ہوں گے۔
گوگل نے اس فیچر کا اعلان جون میں کیا تھا اور اب اس کی آزمائش شروع کی گئی ہے۔
یہ فیچر محدود صارفین کے لیے دستیاب ہے، جو ویڈیوز میں وضاحتی نوٹس شامل کر کے دیگر صارفین کو گمراہ کن مواد سے بچا سکیں گے۔
رپورٹ کے مطابق، اگر کسی صارف کو ویڈیو میں گمراہ کن یا مبہم مواد نظر آتا ہے، تو وہ اس فیچر کا استعمال کر سکتے ہیں۔
صارفین کے لکھے گئے نوٹس کو دیگر صارفین ریویو کریں گے، اور اگر زیادہ تر ریویوز میں ان نوٹس کو مددگار قرار دیا گیا تو وہ ویڈیوز کے نیچے ظاہر ہوں گے۔
یوٹیوب صارفین کو نوٹیفکیشن کے ذریعے آگاہ کرے گا کہ ان کے نوٹس پوسٹ کر دیے گئے ہیں۔
فی الحال یہ فیچر موبائل ڈیوائسز کے لیے متعارف کرایا جا رہا ہے۔
جن صارفین کو یہ فیچر دستیاب ہے، ان کے سامنے ویڈیوز کے نیچے “ایڈ نوٹ” کا آپشن نظر آئے گا، جس پر کلک کر کے وہ اپنا نوٹ تحریر کر سکیں گے۔
صارفین کو اپنے نوٹس میں قابل اعتماد ذرائع کا حوالہ دینا ہوگا اور مواد کو قابل فہم بنانا ضروری ہوگا۔
اہم بات یہ ہے کہ نوٹس لکھنے والے کا نام ظاہر نہیں کیا جائے گا۔
