سڈنی میں کھیلے جا رہے دوسرے ٹی ٹوئنٹی میچ میں آسٹریلیا کے دیے گئے 148 رنز کے ہدف کے تعاقب میں پاکستان کی بیٹنگ جاری ہے۔ آسٹریلیا نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 9 وکٹوں کے نقصان پر 147 رنز بنائے۔ پاکستان کو جیت کے لیے 148 رنز کا ہدف ملا۔
آسٹریلیا کی اننگز کا آغاز جارحانہ تھا، تاہم پاکستانی بولرز نے شاندار کارکردگی دکھائی۔ حارث رؤف نے 4 وکٹیں حاصل کیں، جن میں ٹم ڈیوڈ اور ایرن ہارڈی جیسے اہم کھلاڑی شامل تھے۔ عباس آفریدی نے 3 جبکہ سفیان مقیم نے 2 وکٹیں حاصل کیں۔
پاکستان کی بیٹنگ مشکلات کا شکار رہی۔ کپتان محمد رضوان 16 رنز بنا کر آؤٹ ہوئے، جبکہ بابر اعظم اور صاحبزادہ فرحان بالترتیب 3 اور 5 رنز بنا کر جلد پویلین لوٹ گئے۔ نائب کپتان سلمان علی آغا بغیر کوئی رن بنائے آؤٹ ہوئے، جس سے ٹیم دباؤ میں آگئی۔
آسٹریلیا کی جانب سے میتھیو شارٹ نے 32 رنز بنائے جبکہ گلین میکسویل نے 21 رنز کی اننگز کھیلی۔ پاکستانی بولرز نے آسٹریلیا کو بڑے اسکور تک پہنچنے سے روکا، مگر بیٹنگ لائن کی کارکردگی نے شائقین کو مایوس کیا۔
پاکستانی ٹیم میں ایک تبدیلی کی گئی، حسیب اللّٰہ کی جگہ سفیان مقیم کو شامل کیا گیا۔ آسٹریلوی ٹیم بغیر کسی تبدیلی کے میدان میں اتری۔
یاد رہے، پہلے ٹی ٹوئنٹی میچ میں آسٹریلیا نے پاکستان کو 29 رنز سے شکست دی تھی، جبکہ پاکستان نے ون ڈے سیریز میں 1-2 سے کامیابی حاصل کی تھی۔
