واشنگٹن: امریکی وزیرِ خارجہ مارکو روبیو نے کہا ہے کہ حماس کو غزہ پر دوبارہ حکمرانی اور اسرائیل کے لیے خطرہ بننے کی اجازت نہیں دی جا سکتی۔ یہ بیان ان کی مصری ہم منصب بدر عبدالعاطی سے ملاقات کے دوران سامنے آیا، جہاں دونوں رہنماؤں نے خطے میں امن، سلامتی اور استحکام کو یقینی بنانے کے لیے امریکا اور مصر کے درمیان شراکت داری پر اتفاق کیا۔
امریکی محکمۂ خارجہ کے ترجمان کے مطابق مارکو روبیو نے غزہ میں یرغمالیوں کی رہائی، انسانی امداد کی فراہمی اور طبی انخلاء کے سلسلے میں مصر کے کردار کو سراہا۔ انہوں نے کہا کہ امریکا، مصر کے ساتھ قریبی تعاون جاری رکھے گا تاکہ خطے میں امن و استحکام کو یقینی بنایا جا سکے۔
ملاقات میں مارکو روبیو نے غزہ میں مستقبل کی حکمرانی اور سلامتی سے متعلق تنازعات کے بعد کی منصوبہ بندی پر زور دیا۔ ان کا کہنا تھا کہ اس حوالے سے امریکا اور مصر کے درمیان قریبی رابطہ ضروری ہے تاکہ خطے میں دیرپا استحکام قائم کیا جا سکے۔
دونوں رہنماؤں نے شام میں دہشت گردی کے خطرات سے نمٹنے اور جامع طرزِ حکمرانی کے قیام کے معاملات پر بھی تفصیلی تبادلۂ خیال کیا۔ اس دوران خطے میں جاری تنازعات، انسانی بحرانوں اور شدت پسندی کے خاتمے کے لیے مشترکہ کوششوں پر زور دیا گیا۔
یہ ملاقات ایسے وقت میں ہوئی ہے جب مشرق وسطیٰ میں کشیدگی مسلسل بڑھ رہی ہے، اور امریکا خطے میں اپنے اتحادیوں کے ساتھ مل کر استحکام کے لیے سفارتی روابط کو مزید مضبوط بنانے کی کوشش کر رہا ہے۔
