وفاقی وزیر صنعت و پیداوار رانا تنویر حسین نے اعلان کیا ہے کہ رمضان المبارک کے دوران ملک بھر میں ہر ضلع میں چینی رعایتی نرخوں پر دستیاب ہوگی۔
وفاقی وزارت صنعت و پیداوار کی جانب سے جاری کردہ بیان کے مطابق، رانا تنویر حسین کی زیر صدارت پاکستان شوگر ملز ایسوسی ایشن (PSMA) کا اجلاس ہوا، جس میں رمضان کے دوران عوام کو چینی سستے داموں فراہم کرنے کے اقدامات کا جائزہ لیا گیا۔ اجلاس میں فیصلہ کیا گیا کہ چینی کی تقسیم کے لیے ایک جامع مائیکرو پلان رواں ہفتے پیش کیا جائے گا تاکہ رمضان میں عوام کو کسی قسم کی پریشانی کا سامنا نہ کرنا پڑے۔
اجلاس میں شوگر ملز ایسوسی ایشن نے اس عزم کا اظہار کیا کہ رمضان میں عوامی ضروریات کو مدنظر رکھتے ہوئے کم از کم قیمت پر چینی فراہم کی جائے گی۔ وفاقی وزیر نے بتایا کہ رمضان سے تین دن قبل ملک بھر میں خصوصی چینی اسٹالز قائم کیے جائیں گے، جو 27 رمضان تک جاری رہیں گے۔ ان اسٹالز پر چینی وافر مقدار میں موجود ہوگی تاکہ عوام کو کسی بھی قسم کی قلت کا سامنا نہ کرنا پڑے۔
انہوں نے مزید کہا کہ یہ اقدام صوبائی حکومتوں کے تعاون سے کیا جا رہا ہے اور چینی کی رعایتی قیمت کا باضابطہ اعلان رواں ہفتے کیا جائے گا۔ ان کا کہنا تھا کہ رمضان عبادت اور رحمت کا مہینہ ہے، اس دوران حکومت غریب طبقے کو ریلیف فراہم کرنے کے لیے ہر ممکن اقدامات کرے گی تاکہ عام شہری آسانی سے کم قیمت پر چینی خرید سکیں۔
