مردان میں سوشل میڈیا پر منفی پروپیگنڈا کرنے کے الزام میں ایک شخص کے خلاف پیکا ایکٹ کے تحت مقدمہ درج کرلیا گیا۔ یہ مقدمہ تھانہ سٹی میں درج کیا گیا، جو سوشل میڈیا پر غلط معلومات پھیلانے کے خلاف اپنی نوعیت کا پہلا کیس ہے۔
پولیس کے مطابق ملزم نے خود کو صحافی ظاہر کرتے ہوئے پریس کلب اور اس کے ارکان کے خلاف بے بنیاد الزامات لگائے اور سوشل میڈیا پر ایک منفی مہم چلائی۔ اس مہم کے ذریعے ادارے کی ساکھ کو نقصان پہنچانے کی کوشش کی گئی، جس پر پریس کلب کی جانب سے کارروائی کی درخواست دی گئی۔
درخواست موصول ہونے کے بعد پولیس نے فوری ایکشن لیتے ہوئے پیکا ایکٹ کے تحت مقدمہ درج کرلیا اور ملزم کی گرفتاری کے لیے چھاپے مارنے کا آغاز کردیا ہے۔ حکام کا کہنا ہے کہ ایسے عناصر جو سوشل میڈیا کو غلط معلومات اور پروپیگنڈے کے لیے استعمال کر رہے ہیں، ان کے خلاف سخت کارروائی کی جائے گی۔
قانونی ماہرین کا کہنا ہے کہ پیکا ایکٹ کا مقصد سوشل میڈیا پر غلط بیانی اور جھوٹے الزامات لگانے کے رجحان کی روک تھام ہے، تاکہ کسی بھی فرد یا ادارے کی عزت و وقار کو نقصان نہ پہنچے۔ پولیس کی جانب سے جاری چھاپوں کے بعد توقع کی جا رہی ہے کہ ملزم کو جلد گرفتار کرلیا جائے گا اور قانون کے مطابق کارروائی عمل میں لائی جائے گی۔
