پاکستان ٹیلی کمیونیکیشن اتھارٹی (پی ٹی اے) اور وفاقی تحقیقاتی ایجنسی (ایف آئی اے) کے سائبر کرائم ونگ نے ملک بھر میں غیر قانونی طور پر فعال بین الاقوامی سم کارڈز کی فروخت میں ملوث افراد کے خلاف مشترکہ کریک ڈاؤن کیا۔ اس کارروائی کے دوران مختلف شہروں میں چھاپے مارے گئے، جن میں ایبٹ آباد، اسکردو، پشاور، لاہور اور سیالکوٹ شامل ہیں۔
پی ٹی اے کی جانب سے جاری اعلامیے میں کہا گیا ہے کہ یہ آپریشن ٹیلی کام فراڈ کے خاتمے اور قومی سلامتی کو درپیش خطرات سے نمٹنے کے لیے جاری کوششوں کا حصہ ہے۔ چھاپوں کے دوران ایسے کاروباری اداروں اور افراد کے خلاف کارروائی کی گئی جو بین الاقوامی سم کارڈز کی غیر قانونی فروخت اور ترسیل میں ملوث تھے۔ حکام کے مطابق ان سمز کو دھوکہ دہی، غیر مصدقہ رابطوں اور دیگر مجرمانہ سرگرمیوں کے لیے استعمال کیا جا رہا تھا۔
آپریشن کے دوران مشتبہ افراد کو گرفتار کر لیا گیا اور بڑی تعداد میں غیر قانونی طور پر فعال کیے گئے سم کارڈز برآمد کر لیے گئے۔ پی ٹی اے اور ایف آئی اے کا کہنا ہے کہ وہ غیر قانونی سم کارڈز کی خرید و فروخت پر گہری نظر رکھے ہوئے ہیں، کیونکہ یہ نہ صرف عوامی تحفظ کے لیے خطرہ ہیں بلکہ ان کے ذریعے نامعلوم اور ناقابل سراغ رابطے ممکن ہو جاتے ہیں۔
حکام نے شہریوں کو بھی خبردار کیا ہے کہ وہ غیر قانونی طریقے سے فراہم کی جانے والی سمز کے استعمال سے گریز کریں اور کسی مشتبہ سرگرمی کی اطلاع متعلقہ اداروں کو دیں، تاکہ سائبر کرائم اور ٹیلی کام فراڈ کی روک تھام کو یقینی بنایا جا سکے۔
