سابق آسٹریلوی کپتان رکی پونٹنگ نے چیمپئنز ٹرافی 2025 کے دوران صائم ایوب کی عدم دستیابی کو پاکستان کے لیے ایک بڑا خلا قرار دیا ہے۔
رکی پونٹنگ نے آئی سی سی ریویو سے گفتگو میں کہا کہ صائم ایوب ایک معیاری کھلاڑی ہیں اور ان کی غیر موجودگی پاکستان کی بیٹنگ لائن کو متاثر کر سکتی ہے۔ ان کے مطابق صائم ایوب جیسے جارحانہ اور باصلاحیت بلے باز کا ٹیم میں نہ ہونا ایک بڑا نقصان ہے۔
انہوں نے پاکستان کے فاسٹ بولنگ اٹیک کی تعریف کرتے ہوئے کہا کہ شاہین آفریدی اور نسیم شاہ کی قیادت میں پاکستانی پیس اٹیک کافی مضبوط ہے۔ ان کے مطابق پاکستانی بولرز میں رفتار اور مہارت موجود ہے جو کسی بھی حریف ٹیم کی بیٹنگ لائن کے لیے مشکلات پیدا کر سکتی ہے۔
رکی پونٹنگ نے مزید کہا کہ اگر بابر اعظم اور محمد رضوان چیمپئنز ٹرافی میں اچھی کارکردگی دکھاتے ہیں تو پاکستان ایک خطرناک حریف ثابت ہو سکتا ہے۔ انہوں نے یہ بھی کہا کہ ہوم گراؤنڈ پر بڑے ٹورنامنٹ میں کھیلنے کا دباؤ مثبت اور منفی دونوں انداز میں اثر انداز ہو سکتا ہے۔
واضح رہے کہ چیمپئنز ٹرافی 2025 میں پاکستان اپنا پہلا میچ 19 فروری کو کراچی نیشنل بینک اسٹیڈیم میں نیوزی لینڈ کے خلاف کھیلے گا۔ اس کے بعد 23 فروری کو دبئی میں روایتی حریف بھارت سے ٹکرائے گا، جبکہ آخری گروپ میچ 27 فروری کو راولپنڈی میں بنگلہ دیش کے خلاف ہوگا۔
کرکٹ شائقین کو امید ہے کہ پاکستان اپنے ہوم گراؤنڈ پر ایک شاندار کارکردگی دکھائے گا اور چیمپئنز ٹرافی میں مضبوط ٹیموں کے خلاف فتح حاصل کرے گا۔
