بنگلادیش میں حالیہ سیلاب سے 15 افراد ہلاک اور لاکھوں متاثر ہوئے ہیں۔
بنگلادیشی میڈیا کے مطابق، 11 اضلاع میں شدید بارشوں کے بعد سیلاب نے بدترین صورت اختیار کر لی ہے، جس کے نتیجے میں 48 لاکھ افراد متاثر ہوئے ہیں اور 15 افراد کی ہلاکت کی تصدیق ہوئی ہے۔
مقامی میڈیا نے بتایا کہ تقریباً 9 لاکھ لوگ سیلابی صورتحال میں پھنسے ہوئے ہیں۔ متاثرہ اضلاع میں فینی، کومیلا، نوخالی، لکشمی پور اور دیگر شامل ہیں۔ فینی میں شدید بارشوں اور سیلاب کی وجہ سے 92 فیصد موبائل ٹاورز گر چکے ہیں، جس سے شہریوں کا آپس میں رابطہ تقریباً ختم ہو گیا ہے۔
محکمہ موسمیات کے حکام کا کہنا ہے کہ سیلاب کی صورتحال میں بہتری آ رہی ہے۔ سیلاب زدہ علاقوں میں پھنسے ہوئے 1 لاکھ 88 ہزار افراد کو ریسکیو کر کے کیمپوں میں منتقل کیا گیا ہے، اور متاثرہ علاقوں میں اب تک ساڑھے تین کروڑ ٹکا نقد رقم تقسیم کی گئی ہے۔ مزید برآں، 20 ٹن چاول اور 15 ہزار خشک خوراک کے پیکٹس بھی فراہم کیے جا چکے ہیں۔
حکام نے بتایا کہ سیلاب زدہ علاقوں میں فوج کے تحت ریسکیو آپریشن جاری ہے، جس میں نیوی، کوسٹ گارڈ، فائر سروسز، پولیس اور دیگر ادارے شامل ہیں۔
