شمالی وزیرستان کے علاقے دتہ خیل میں سیکیورٹی فورسز نے خفیہ اطلاعات کی بنیاد پر دہشت گردوں کے خلاف بھرپور کارروائی کرتے ہوئے 14 خوارج کو ہلاک کر دیا۔ پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق یہ آپریشن فتنہ الخوارج سے وابستہ عناصر کی موجودگی کی اطلاع پر کیا گیا، جو ملک میں بدامنی پھیلانے کی کوششوں میں مصروف تھے۔
آپریشن کے دوران فورسز اور دہشت گردوں کے درمیان شدید فائرنگ کا تبادلہ ہوا، جس کے نتیجے میں 14 دہشت گرد ہلاک ہوئے۔ آئی ایس پی آر کے مطابق ان خوارج کے ٹھکانے کو مؤثر انداز میں نشانہ بنایا گیا، اور یہ افراد بھارت کی سرپرستی میں پاکستان میں سرگرم تھے۔
آئی ایس پی آر کا مزید کہنا تھا کہ سیکیورٹی فورسز نے علاقے میں مزید ممکنہ دہشت گردوں کی تلاش کے لیے کلیئرنس آپریشن بھی شروع کر دیا ہے، تاکہ شمالی وزیرستان کو مکمل طور پر دہشت گردی سے پاک کیا جا سکے۔
فوجی حکام کا کہنا ہے کہ دشمن عناصر کی پشت پناہی بھارت جیسے ملک سے کی جا رہی ہے، لیکن پاکستان کی سیکیورٹی فورسز ہر سطح پر دہشت گردی کا مقابلہ کرنے کے لیے پرعزم ہیں۔ اس کامیاب کارروائی سے ایک بار پھر یہ پیغام واضح ہوگیا کہ ملکی سلامتی کے خلاف کسی بھی کوشش کو سختی سے کچلا جائے گا۔
