14 اگست کی شام یا رات سے 18 اگست تک ملک میں شدید بارشوں کی پیشگوئی کی گئی ہے۔
محکمہ موسمیات کے مطابق، مغربی ہواؤں، بحیرہ عرب، اور خلیج بنگال سے مون سون ہوائیں ملک پر اثر انداز ہوں گی، جس کے نتیجے میں اسلام آباد، پنجاب، سندھ، خیبر پختونخوا، بلوچستان، گلگت بلتستان اور کشمیر کے کچھ مقامات پر موسلادھار بارشیں ہو سکتی ہیں۔
محکمہ موسمیات کے مطابق 15 اگست کی شام یا رات سے 18 اگست کے دوران سندھ کے ساحلی علاقوں میں مطلع ابر آلود رہنے اور ہلکی بارش کا امکان ہے۔
دوسری جانب بلوچستان کے مختلف اضلاع میں بارش کا سلسلہ جاری ہے، اور محکمہ موسمیات نے 15 اگست سے بلوچستان کے 16 اضلاع میں آندھی اور گرج چمک کے ساتھ بارش کے نئے اسپیل کی پیشگوئی کی ہے۔
محکمہ موسمیات نے 15 سے 18 اگست کے دوران خضدار، لسبیلہ، آواران، قلات، ژوب، بارکھان، موسیٰ خیل، مستونگ، سبی، شیرانی، کوہلو، بولان، ہرنائی، نصیر آباد، جعفرآباد اور مکران کے ساحلی علاقوں میں تیز ہواؤں، گرج چمک کے ساتھ وقفے وقفے سے بارش اور چند مقامات پر موسلادھار بارش کی پیشگوئی کی ہے۔
گزشتہ 24 گھنٹوں کے دوران بارکھان اور قلات میں 6، 6 ملی میٹر بارش ریکارڈ کی گئی ہے۔ اس کے علاوہ پیر کو نوکنڈی میں سب سے زیادہ گرمی پڑی، جہاں زیادہ سے زیادہ درجہ حرارت 47 ڈگری سینٹی گریڈ ریکارڈ کیا گیا۔
