ماضی کی مشہور اداکارہ ریشم نے کہا کہ انہیں عمران خان بطور سیاستدان نہیں، بلکہ ایک انسان کے طور پر بہت پسند ہیں کیونکہ انہوں نے دکھی انسانیت کے لیے جو کچھ کیا، وہ کسی دوسرے حکمران نے نہیں کیا۔
حال ہی میں اداکار احمد بٹ کے پوڈکاسٹ میں شریک ہوتے ہوئے ریشم نے کہا کہ میزبان کے سوال ‘سنا ہے شہباز شریف صاحب آپ کو پسند ہیں’ کے جواب میں، ‘پلیز! مجھے عمران خان بھی بہت پسند ہیں۔ مجھے ان کی پسندیدگی اس لیے ہے کیونکہ وہ سیاستدان سے زیادہ ایک اچھے دل اور اچھے جذبات رکھنے والے انسان ہیں، اور ان کا نظریہ پاکستان کے لیے بہت اچھا ہے’۔
ریشم نے مزید کہا، ‘سیاست میں نظریات بدلتے رہتے ہیں۔ میں شوکت خانم اسپتال کے افتتاح کے وقت وہاں گئی تھی اور کرکٹ بھی بہت شوق سے دیکھتی تھی۔ مجھے عمران خان شوکت خانم کی وجہ سے پسند ہیں۔ دکھی انسانیت کے لیے انہوں نے جو کچھ کیا، وہ کسی حکمران نے نہیں کیا، اور میں یہ بات بہت بار کہہ چکی ہوں’۔
اداکارہ نے میزبان سے سوال کیا، ‘کیا انسان بڑا ہونا اچھی بات ہے یا سیاستدان بڑا ہونا؟’ انہوں نے کہا، ‘لوگ مجھے تنقید کا نشانہ بناتے ہیں، لیکن میں نے کبھی عمران خان کی مقبولیت کو تسلیم کرنے سے انکار نہیں کیا۔ ان کے لیے جو دیوانگی ہے، وہ تو کسی دوسرے ملک کے صدر کے لیے بھی نہیں ہوگی’۔
