امریکا اور نیدرلینڈز کے حکام نے دنیا بھر میں ہیکنگ ٹولز فروخت کرنے اور مالی فراڈ میں ملوث ایک پاکستانی گروہ کے خلاف بڑی کارروائی کرتے ہوئے 39 سائبر کرائم ویب سائٹس بلاک کر دیں۔
امریکی محکمۂ انصاف کی جاری کردہ پریس ریلیز کے مطابق، پاکستان سے چلنے والی یہ ویب سائٹس بین الاقوامی سطح پر ہیکنگ اور مالی دھوکا دہی میں ملوث گروہوں کو غیر قانونی ٹولز فراہم کر رہی تھیں۔ ان ویب سائٹس کے سرورز کو بھی بند کر دیا گیا ہے، جو فشنگ کٹس، اسکیمنگ پیجز اور ای میل ایکسٹریکٹرز جیسے ہیکنگ ٹولز کی فروخت میں استعمال ہو رہے تھے۔
یہ کارروائی ڈچ نیشنل پولیس کے تعاون سے کی گئی، جس میں ‘صائم رضا’ گروپ، جسے ‘ہارٹ سینڈر’ کے نام سے بھی جانا جاتا ہے، کے زیرِ انتظام چلنے والی آن لائن مارکیٹ پلیسز کو نشانہ بنایا گیا۔ رپورٹ کے مطابق، یہ نیٹ ورک 2020ء سے سرگرم تھا اور امریکی شہریوں کو نشانہ بنا کر اب تک 30 لاکھ ڈالرز سے زائد کا نقصان پہنچا چکا تھا۔
محکمۂ انصاف کا کہنا ہے کہ اس گروہ کے ذریعے کاروباری ای میلز ہیک کرکے جعلی ادائیگیوں کے لیے کمپنیوں کو دھوکا دیا جاتا تھا، جس کے نتیجے میں بھاری رقوم ہیکرز کے کنٹرول میں موجود اکاؤنٹس میں منتقل ہو جاتی تھیں۔
حکام کا کہنا ہے کہ سائبر کرائم کے خلاف مزید کارروائیاں بھی جاری رہیں گی تاکہ ایسے نیٹ ورکس کو مکمل طور پر ختم کیا جا سکے۔
