حکومت پنجاب نے رمضان المبارک کے دوران نادار اور مستحق افراد کی مدد کیلئے نگہبان رمضان پیکیج کے تحت آن لائن پورٹل اور ہیلپ لائن قائم کر دی ہے۔ اس پیکیج کا مقصد عوام کو سہولت اور عزت کے ساتھ ان کے حقوق فراہم کرنا ہے۔
وزیراعلیٰ پنجاب مریم نواز کی زیر صدارت نگہبان رمضان پیکیج کے حوالے سے ایک اجلاس منعقد ہوا، جس میں پیکیج کے نفاذ سے متعلق تجاویز اور سفارشات پر غور کیا گیا۔ اجلاس کے دوران بریفنگ دیتے ہوئے بتایا گیا کہ نگہبان رمضان پیکیج سے مستفید ہونے کے لیے پی ایس ای آر (PSER) میں رجسٹریشن ضروری ہوگی۔ شہری اس مقصد کے لیے گھر بیٹھے آن لائن پورٹل پر درخواست دے سکتے ہیں۔
علاوہ ازیں، عوام یونین کونسل اور بلدیہ کے دفاتر میں جا کر بھی رجسٹریشن کروا سکتے ہیں۔ حکومت نے تمام عمل کو آسان اور عوام دوست بنانے پر خصوصی توجہ دی ہے تاکہ مستحق افراد کو کسی قسم کی پریشانی کا سامنا نہ کرنا پڑے۔
وزیراعلیٰ پنجاب مریم نواز نے اجلاس میں کہا کہ نگہبان رمضان پیکیج نادار افراد کا حق اور حکومت کی ذمہ داری ہے۔ انہوں نے واضح کیا کہ عوام کو عزت و احترام کے ساتھ ان کا حق دیا جائے گا اور اس بات کو یقینی بنایا جائے گا کہ کسی کو طویل قطاروں میں کھڑے ہونے کی ضرورت نہ پڑے۔
حکومت پنجاب کا یہ اقدام ناصرف ضرورت مندوں کی مدد کا ذریعہ بنے گا بلکہ رمضان المبارک میں عوام کو سہولت فراہم کرنے کی ایک مثبت مثال بھی ثابت ہوگا۔
