اسرائیلی وزیراعظم نیتن یاہو نے امریکی صدر ڈونلڈ ٹرمپ کو دوسری مدت کے لیے امریکا کا صدر بننے پر مبارکباد دی ہے۔ اپنے ویڈیو پیغام میں نیتن یاہو نے صدر ٹرمپ کی پہلی مدت صدارت میں اسرائیل کے لیے اٹھائے گئے اقدامات کو سراہا۔ انہوں نے کہا کہ ٹرمپ نے ایرانی جوہری معاہدے سے علیحدگی اختیار کرکے اور دیگر فیصلوں کے ذریعے اسرائیل کو نمایاں حمایت فراہم کی۔
نیتن یاہو نے امید ظاہر کی کہ صدر ٹرمپ کی دوسری مدت صدارت خطے میں ایران کے دہشت گردانہ اثرات کے خاتمے کے لیے ایک فیصلہ کن کردار ادا کرے گی۔ انہوں نے مزید کہا کہ یہ مدت مشرق وسطیٰ میں امن اور خوشحالی کے ایک نئے دور کا آغاز ثابت ہوگی۔
وزیراعظم نیتن یاہو نے غزہ کی صورت حال پر بھی بات کی اور کہا کہ وہ صدر ٹرمپ کے ساتھ مل کر حماس کی عسکری طاقت کو کم کرنے اور غزہ پر حماس کی حکمرانی کے خاتمے کے لیے کام کرنے کے خواہاں ہیں۔ انہوں نے غزہ سے دیگر یرغمالیوں کی رہائی کی اہمیت پر بھی زور دیا۔
واضح رہے کہ ڈونلڈ ٹرمپ نے امریکا کے 47ویں صدر کی حیثیت سے دوسری مدت کا حلف اٹھایا۔ یہ حلف امریکی سپریم کورٹ کے چیف جسٹس جان رابرٹس نے لیا۔ ٹرمپ کی دوسری مدت کو خطے میں امن و استحکام کے فروغ کے لیے ایک اہم پیش رفت کے طور پر دیکھا جا رہا ہے۔
