واشنگٹن: نومنتخب امریکی صدر ڈونلڈ ٹرمپ کے نامزد خصوصی ایلچی رچرڈ گرینل نے ایک بیان میں پاکستان کے سابق وزیراعظم عمران خان کی رہائی کا مطالبہ کیا ہے۔ انہوں نے کہا کہ عمران خان پر الزامات بھی وہی ہیں جو سابق امریکی صدر ڈونلڈ ٹرمپ پر عائد کیے گئے تھے۔ ان کا کہنا تھا کہ جس طرح ٹرمپ کو امریکی مخالفین نے مختلف مقدمات میں الجھایا تھا، اسی طرح عمران خان کو بھی پاکستان میں حکومت نے جھوٹے الزامات پر قید کر رکھا ہے۔
رچرڈ گرینل نے امریکی نشریاتی ادارے کو دیے گئے انٹرویو میں مزید کہا کہ عمران خان روایتی سیاستدان نہیں ہیں بلکہ وہ کامن سینس کی بات کرتے ہیں، اور اسی وجہ سے ان کے ٹرمپ کے ساتھ اچھے تعلقات تھے۔ انہوں نے کہا کہ ایٹمی صلاحیت رکھنے والے ممالک کے ساتھ مختلف انداز میں بات چیت کی جاتی ہے، اور اس کے باوجود بائیڈن انتظامیہ پاکستان کے ساتھ تعلقات کو آگے بڑھانے میں ناکام رہی ہے۔ ان کا کہنا تھا کہ بائیڈن انتظامیہ وہ کام جو گزشتہ چار سالوں میں نہیں کر پائی، اب آخری 45 دنوں میں کرنے کی کوشش کر رہی ہے۔
رچرڈ گرینل نے عمران خان کی رہائی کے حوالے سے بار بار مطالبہ کیا اور کہا کہ بائیڈن انتظامیہ پاکستان کو نظرانداز کرنے کی پالیسی کو ترک کرے۔ انہوں نے یہ بھی کہا کہ امریکی محکمہ خارجہ کے ترجمان میتھیو ملر پاکستان کے فوجی عدالتوں کے فیصلوں پر محتاط ردعمل دے رہے ہیں اور وہ کھل کر یہ نہیں کہتے کہ عمران خان کو رہا کیا جائے۔
رچرڈ گرینل نے پاکستان کے میزائل پروگرام پر بھی بات کی اور کہا کہ اس معاملے پر امریکہ کی تشویش برقرار ہے۔ ان کا کہنا تھا کہ جوہری طاقت رکھنے والے ممالک کے ساتھ سخت انداز میں ڈیل کی جاتی ہے، اور پاکستان بھی ان ممالک میں شامل ہے۔
یہ بیان ایک ایسے وقت میں آیا ہے جب پاکستان میں عمران خان کے خلاف قانونی کارروائیاں اور ان کی رہائی کے مطالبات شدت اختیار کر رہے ہیں۔ رچرڈ گرینل نے کہا کہ غیر روایتی سیاستدان ملک کی بہتر قیادت کر سکتے ہیں، اور اسی لیے انہیں یقین ہے کہ عمران خان کی رہائی سے پاکستان میں استحکام آ سکتا ہے۔
