سڈنی: کرکٹ آسٹریلیا نے چیمپئنز ٹرافی کے لیے اپنی 15 رکنی ٹیم کا اعلان کر دیا، تاہم فاسٹ بولر میچل اسٹارک نے ذاتی وجوہات کی بنا پر اسکواڈ سے دستبرداری اختیار کر لی ہے۔ کرکٹ آسٹریلیا نے ان کے فیصلے کی حمایت کرتے ہوئے تصدیق کی کہ اسٹارک میڈیا میں اس معاملے پر کوئی تبصرہ نہیں کریں گے اور پرائیویسی کی درخواست کی ہے۔
میچل اسٹارک کے علاوہ آسٹریلوی ٹیم کو مزید کئی مشکلات کا سامنا ہے، کیونکہ کپتان پیٹ کمنز، جوش ہیزل ووڈ اور میچل مارش پہلے ہی انجری مسائل کے باعث چیمپئنز ٹرافی میں شرکت سے محروم ہو چکے ہیں، جبکہ آل راؤنڈر مارکوس اسٹوئنس ون ڈے کرکٹ سے ریٹائرمنٹ کا اعلان کر چکے ہیں۔
کرکٹ آسٹریلیا کی جانب سے اعلان کردہ اسکواڈ کی قیادت تجربہ کار بلے باز اسٹیو اسمتھ کریں گے۔ ٹیم میں شان ایبٹ، الیکس کیری، بین ڈار شیوس، نیتھن ایلس، جیک فریزر میکگرک، ایرون ہارڈی، ٹریوس ہیڈ، جوش انگلس اور سپینسر جانسن کو شامل کیا گیا ہے۔ مارنوس لبوشین، گلین میکسویل، تنویر سنگھا، میتھیو شارٹ اور ایڈم زمپا بھی اسکواڈ کا حصہ ہوں گے۔
چیئرمین سلیکشن پینل جارج بیلی نے کہا کہ ٹیم میں کئی تبدیلیاں انجریز اور ریٹائرمنٹ کے سبب کی گئی ہیں۔ انہوں نے مزید کہا کہ اسکواڈ میں ان کھلاڑیوں کو شامل کیا گیا ہے جنہوں نے گزشتہ 12 ماہ کے دوران نمایاں کارکردگی کا مظاہرہ کیا ہے۔
آسٹریلیا کی چیمپئنز ٹرافی مہم کے لیے اسکواڈ میں ہونے والی ان غیر متوقع تبدیلیوں نے ٹیم کے چیلنجز میں اضافہ کر دیا ہے، تاہم اسٹیو اسمتھ کی قیادت میں آسٹریلوی ٹیم ایک متوازن اور تجربہ کار کمبی نیشن کے ساتھ میدان میں اترنے کے لیے تیار ہے۔
