پاکستان نے افغان صوبے پکتیکا میں ایک کامیاب فضائی کارروائی کی، جس میں 71 سے زائد خوارج ہلاک ہو گئے اور ان کے 4 اہم مراکز تباہ کر دیے گئے۔ پاکستانی سیکورٹی ذرائع کے مطابق، ان مراکز میں ایک خودکش جیکٹ بنانے کی فیکٹری اور خوارج کا “عمر میڈیا سیل” بھی شامل تھا۔ یہ کارروائیاں انتہائی درستگی کے ساتھ کی گئیں، جس کے نتیجے میں مقامی آبادی کو کسی قسم کا نقصان نہیں پہنچا۔
پاکستانی حکام کا کہنا ہے کہ اس کارروائی کا مقصد پاکستان کے دشمنوں کو واضح پیغام دینا تھا کہ پاکستان دہشت گردوں کے ٹھکانوں کو نشانہ بناتا رہے گا، چاہے وہ کہیں بھی چھپے ہوں۔ ایک سینئر سیکیورٹی افسر نے بتایا کہ افغانستان کے ساتھ پاکستان کے تعلقات میں افغان طالبان سے کیے گئے وعدوں کے حوالے سے خدشات ہیں، کیونکہ طالبان نے پاکستان کی سرحد پر حملوں کی روک تھام کے اپنے وعدے پورے نہیں کیے۔ انہوں نے کہا کہ افغان طالبان کو اپنے وعدے پورے کرنے ہوں گے تاکہ دونوں ممالک کے تعلقات میں بہتری آ سکے۔
افغان وزارت دفاع کے مطابق، اس فضائی کارروائی میں 46 سویلین ہلاک ہو گئے ہیں، جس پر افغان حکومت نے شدید احتجاج کیا ہے۔ افغان وزارت خارجہ نے پاکستان کے سفارت خانے کے ناظم الامور کو طلب کر کے احتجاجی مراسلہ بھی جاری کیا۔
پاکستانی حکام کا کہنا ہے کہ ان کارروائیوں کا مقصد خوارج کے نیٹ ورک کو تباہ کرنا تھا اور ان کے مراکز کو ختم کر کے ان کے اثر و رسوخ کو محدود کرنا تھا۔ ان کے مطابق، اس کارروائی میں عام شہریوں کو کسی قسم کا نقصان نہیں پہنچا اور یہ حملے صرف دہشت گردوں کے ٹھکانوں پر مرکوز تھے۔
