اردن کے وزیر خارجہ ایمن الصفدی نے اعلان کیا ہے کہ اردن اپنے شامی بھائیوں کے ساتھ کھڑا ہے اور شام کی تعمیر نو میں مدد فراہم کرنے کے لیے تیار ہے۔ ان خیالات کا اظہار انہوں نے دمشق میں شام کے نئے رہنما احمد الشرح المعروف ابو محمد الجولانی سے ملاقات کے دوران کیا۔
خبر رساں اداروں کے مطابق، ایمن الصفدی نے ملاقات میں کہا کہ اردن ایک مستحکم اور محفوظ شام کا خواہاں ہے، جو شامی عوام کی امنگوں کے مطابق ان کے حقوق کی ضمانت دے۔ انہوں نے مزید کہا کہ شام کی بحالی میں تعاون خطے کے امن و استحکام کے لیے ناگزیر ہے۔
یہ ملاقات ایسے وقت میں ہوئی جب شام میں بشار الاسد کی معزولی کے بعد نئی انتظامیہ کے ساتھ علاقائی رہنماؤں کے روابط بڑھ رہے ہیں۔ احمد الشرح کی قیادت میں ہیئۃ التحریر الشام (ایچ ٹی ایس) نئی شامی حکومت کے طور پر کام کر رہی ہے، اور مختلف ممالک کے وفود ان سے ملاقات کر رہے ہیں۔
واضح رہے کہ اس سے قبل سعودی عرب اور ترکی کے اعلیٰ وفود نے بھی احمد الشرح سے ملاقات کی تھی۔ ان ملاقاتوں کا مقصد شام کی تعمیر نو کے عمل کو تیز کرنا اور نئے رہنما کے ساتھ سفارتی تعلقات کو مضبوط بنانا ہے۔
اردن کی جانب سے اس تعاون کی پیشکش خطے میں استحکام اور ترقی کے لیے ایک اہم قدم تصور کی جا رہی ہے، جس سے شام میں جنگ کے اثرات کو کم کرنے اور عوام کے لیے بہتر مستقبل کی راہ ہموار ہوگی۔
