وزیراعظم شہباز شریف نے کہا ہے کہ غزہ میں جنگ فوری طور پر ختم ہونی چاہیے تاکہ خطے اور دنیا کے امن کو یقینی بنایا جا سکے۔ قاہرہ میں ڈی ایٹ ممالک کے 11ویں سربراہی اجلاس سے خطاب کرتے ہوئے انہوں نے اس بات پر زور دیا کہ غزہ میں جنگ بندی کا فیصلہ عالمی سطح پر امن کے قیام کے لیے ضروری ہے۔
وزیراعظم نے کہا کہ چھوٹے اور درمیانے درجے کے کاروبار (ایس ایم ایز) اور نوجوان افراد معاشی ترقی کے اہم محرک ہیں۔ انہوں نے نوجوانوں کی توانائی، تخلیقی صلاحیتوں اور نئے خیالات کو سراہا، اور کہا کہ نوجوانوں کو بااختیار بنانے سے معاشی ترقی کو فروغ ملے گا۔ انہوں نے کہا کہ ایس ایم ایز نہ صرف ملازمتیں پیدا کرتے ہیں بلکہ مقامی کاروبار کو بھی مضبوط کرتے ہیں۔
شہباز شریف نے اس بات پر زور دیا کہ ڈی ایٹ ممالک کے لیے نوجوانوں کو بااختیار بنانا انتہائی اہمیت کا حامل ہے۔ ان کا کہنا تھا کہ سربراہی اجلاس کا موضوع “21ویں صدی میں ہماری اجتماعی خوشحالی کا واضح خاکہ” ہے، اور پاکستان کی 60 فیصد سے زائد آبادی 30 سال سے کم عمر افراد پر مشتمل ہے۔
انہوں نے مزید کہا کہ حکومت پاکستان اپنے فلیگ شپ یوتھ پروگرام کے ذریعے معیاری تعلیم اور روزگار کے مواقع فراہم کرنے کے لیے پرعزم ہے۔ 2013ء سے اب تک اس پروگرام کے تحت 6 لاکھ سے زائد لیپ ٹاپس تقسیم کیے جا چکے ہیں اور ہزاروں اسکالرشپس فراہم کی گئی ہیں۔ وزیراعظم نے کہا کہ لاکھوں نوجوانوں کو جدید شعبوں جیسے مصنوعی ذہانت، ڈیٹا اینالیٹکس، اور سائبر سیکیورٹی میں فنی تربیت فراہم کی جا رہی ہے۔ اس کے علاوہ، پاکستان دنیا کی سب سے بڑی فری لانسر کمیونٹیز میں سے ایک ہے۔
وزیراعظم نے اس بات پر زور دیا کہ پاکستان کی ترقی میں نوجوانوں کا کردار اہم ہے، اور حکومت ہر ممکن قدم اٹھا رہی ہے تاکہ انہیں معاشی ترقی اور خوشحالی میں حصہ دار بنایا جا سکے۔
