پاکستان اسٹاک ایکسچینج نے پچھلے تمام ریکارڈز توڑتے ہوئے تاریخی بلندیوں کو چھو لیا۔ جمعرات کے روز کاروبار کے آغاز سے ہی زبردست تیزی دیکھی گئی، جس کے نتیجے میں کے ایس ای 100 انڈیکس نے یکے بعد دیگرے تین نئی بلند ترین سطحیں عبور کر لیں۔
کاروباری دن کے دوران انڈیکس میں 2431 پوائنٹس کا غیر معمولی اضافہ ہوا، اور انڈیکس 113,242 پوائنٹس کی نئی بلند ترین سطح پر پہنچ گیا۔ اس دوران 1 لاکھ 11 ہزار، 1 لاکھ 12 ہزار، اور 1 لاکھ 13 ہزار پوائنٹس کی حد کو عبور کیا گیا، جو کہ پاکستان اسٹاک مارکیٹ کی تاریخ میں ایک اہم سنگ میل ہے۔
تجزیہ کاروں کے مطابق، مضبوط معاشی بنیادیں اور بہتر معاشی اشاریے اس غیر معمولی تیزی کی اہم وجوہات ہیں۔ شرح سود میں نمایاں کمی، حصص کی قیمتوں میں سرمایہ کاری کے لیے کشش، اور حساس قیمتوں کے اشاریے میں کمی کی توقعات نے سرمایہ کاروں کا اعتماد بحال کیا ہے، جس کے باعث مارکیٹ میں ریکوری دیکھی جا رہی ہے۔
یاد رہے کہ ایک دن قبل بھی پاکستان اسٹاک ایکسچینج نے شاندار کارکردگی کا مظاہرہ کیا تھا، جہاں کاروبار کے اختتام پر کے ایس ای 100 انڈیکس 1,913.57 پوائنٹس کے اضافے کے ساتھ 110,810.22 پوائنٹس کی بلند ترین سطح پر بند ہوا تھا۔
سرمایہ کاروں اور ماہرین کا کہنا ہے کہ مثبت معاشی پالیسیوں اور حکومتی اقدامات نے اس شاندار کارکردگی میں کلیدی کردار ادا کیا ہے، جو ملکی معیشت کے لیے ایک حوصلہ افزا اشارہ ہے۔
