اقوامِ متحدہ کے انسانی امور کے ادارے نے شام میں خوراک کی شدید قلت اور معاشی بحران کے حوالے سے ایک نئی رپورٹ جاری کی ہے۔ رپورٹ کے مطابق، بشارالاسد کی حکومت کے خاتمے کے بعد شام کے کئی بڑے شہر جیسے دمشق، دیرالزور، حماۃ اور دیگر علاقوں میں خوراک کی شدید کمی کا سامنا ہے، جس سے عوام کی روزمرہ زندگی متاثر ہو رہی ہے۔
رپورٹ میں بتایا گیا ہے کہ 27 نومبر سے 9 دسمبر تک ادلب اور حلب میں روٹی کی قیمت میں 900 فیصد تک اضافہ ہوا ہے، جس کے نتیجے میں غریب اور متوسط طبقہ خاص طور پر متاثر ہوا ہے۔ اس کے علاوہ، مرغی کی قیمت میں بھی 119 فیصد اضافہ دیکھنے کو ملا ہے، جس سے لوگوں کی خوراک تک رسائی مزید مشکل ہو گئی ہے۔
قنیطرہ، منبج اور دیرالزور میں خوراک کی تقسیم میں بھی مشکلات پیش آ رہی ہیں، اور معاشی عدم استحکام کے باعث بیشتر دکانیں بند ہیں۔ تاجروں نے اجناس کو ذخیرہ کر لیا ہے، جس کی وجہ سے عوام کو ضروری اشیاء کی کمی کا سامنا ہے۔ اس صورتحال میں تقریباً 6 ہزار خاندانوں کو فوری طور پر خوراک کی امداد کی ضرورت ہے۔
رپورٹ کے مطابق، شام میں خوراک کی کمی کے ساتھ ساتھ دیگر انسانی مسائل بھی سنگین ہیں، جنہیں حل کرنے کے لیے بین الاقوامی سطح پر فوری کارروائی کی ضرورت ہے۔ اسی دوران، امریکی وزیرِ خارجہ انٹونی بلنکن جمعے کو ترکیہ کا دورہ کرنے والے ہیں، جہاں وہ ترک وزیرِ خارجہ سے شام کی موجودہ صورتحال پر تبادلہ خیال کریں گے۔
