وفاقی وزیر خزانہ محمد اورنگزیب نے واضح کیا ہے کہ عالمی مالیاتی ادارے (آئی ایم ایف) کے ساتھ پیٹرولیم مصنوعات پر سیلز ٹیکس لگانے کے حوالے سے کوئی بات چیت نہیں ہو رہی۔ کراچی میں اوورسیز چیمبرز آف کامرس میں میڈیا سے گفتگو کرتے ہوئے انہوں نے مختلف معاشی مسائل پر بات کی اور حکومتی پالیسیوں کے اثرات کا ذکر کیا۔
وزیر خزانہ نے کہا کہ مہنگائی میں کمی آ رہی ہے اور عالمی سطح پر مرغی اور دالوں کی قیمتوں میں بھی کمی دیکھنے کو مل رہی ہے۔ انہوں نے مڈل مین کے کردار کو ختم کرنے کی ضرورت پر زور دیا تاکہ عوام تک اشیائے خوردونوش سستے داموں پہنچ سکیں۔
انہوں نے نجی شعبے کی اہمیت کو اجاگر کرتے ہوئے کہا کہ معیشت کی مضبوطی میں پرائیویٹ سیکٹر کا کردار کلیدی ہے۔ انہوں نے انکشاف کیا کہ 6 سالوں میں ملکی معیشت کو 6 ٹریلین روپے کا نقصان ہوا ہے، جبکہ ملٹی نیشنل کمپنیوں نے 2.2 ارب ڈالر منافع بیرون ملک منتقل کیا ہے۔
محمد اورنگزیب نے کاروباری اعتماد میں اضافے کو خوش آئند قرار دیا اور بتایا کہ حکومت نے 900 سے زائد جعلی پیٹرول پمپ سیل کر دیے ہیں۔ انہوں نے کہا کہ ملٹی نیشنل کمپنیوں کو ایکسپورٹ بڑھانے کی ترغیب دی جا رہی ہے اور سرمایہ کاروں کو سہولت فراہم کرنا حکومت کی ذمہ داری ہے۔
انہوں نے مزید کہا کہ مقامی مصنوعات کو عالمی سطح پر متعارف کرانا ضروری ہے اور تجارت و سرمایہ کاری کے فروغ کے لیے مؤثر اقدامات کیے جائیں گے۔ حکومتی پالیسیوں کے باعث معیشت مستحکم ہو رہی ہے اور نجی شعبے کے مسائل حل کرنے پر توجہ دی جا رہی ہے۔
