پاکستان کرکٹ بورڈ (پی سی بی) کے چیئرمین محسن نقوی نے پاکستان بلائنڈ کرکٹ ٹیم کو ٹی 20 ورلڈ کپ جیتنے پر دل کی گہرائیوں سے مبارکباد دی ہے۔ محسن نقوی نے کہا کہ بلائنڈ کرکٹ ٹیم نے شاندار کھیل پیش کیا اور اپنے حوصلے اور عزم سے دنیا کو یہ ثابت کر دیا کہ وہ کرکٹ میں کسی سے کم نہیں۔ ان کا کہنا تھا کہ پوری ٹیم نے ٹورنامنٹ کے دوران عمدہ کارکردگی دکھائی، جس کی بدولت پاکستان نے ٹی 20 ورلڈ چیمپئن کا اعزاز حاصل کیا۔
محسن نقوی نے بلائنڈ کرکٹ ٹیم کے کپتان نثار علی اور کھلاڑی محمد صفدر کی شاندار بیٹنگ کو سراہا، جنہوں نے فائنل میں فتح کی راہ ہموار کی۔ چیئرمین پی سی بی نے ٹیم کی مینجمنٹ کو بھی مبارکباد دی اور ان کی محنت اور رہنمائی کی قدر کی۔
محسن نقوی نے اس بات پر زور دیا کہ بلائنڈ کرکٹ ٹیم نے ٹورنامنٹ کے ہر میچ میں شاندار ٹیم ورک کا مظاہرہ کیا اور ہر کھلاڑی نے بھرپور محنت کی۔ انہوں نے امید ظاہر کی کہ پاکستان بلائنڈ کرکٹ ٹیم اپنے جذبے کے ساتھ مستقبل میں بھی اسی طرح کامیابیاں حاصل کرے گی۔
اس کے ساتھ ہی گورنر سندھ کامران ٹیسوری نے بھی قومی بلائنڈ کرکٹ ٹیم کو ٹی 20 ورلڈ کپ کی فتح پر مبارکباد دی۔ کامران ٹیسوری نے کہا کہ ٹیم کی شاندار کارکردگی قابلِ تحسین ہے اور محمد صفدر اور عارف حسین کی پرفارمنس کو نمایاں طور پر سراہا۔ ان کا کہنا تھا کہ یہ فتح پاکستان کے لیے ایک بڑی کامیابی ہے اور نوجوان کرکٹرز کے لیے ایک روشن مثال ہے۔
گورنر سندھ نے مزید کہا کہ قومی بلائنڈ کرکٹ ٹیم نے نہ صرف ملک کا نام روشن کیا بلکہ دنیا بھر میں یہ پیغام بھی دیا کہ معذوری کا مطلب ہار نہیں ہوتا، بلکہ محنت اور عزم کے ساتھ ہر مشکل کو شکست دی جا سکتی ہے۔
