ڈیموکریٹک پارٹی کی صدارتی امیدوار کملا ہیرس نے امریکی صدارتی انتخابات میں شکست کے بعد اپنی شکست کو تسلیم کرتے ہوئے کہا کہ الیکشن کے نتائج کو قبول کرنا جمہوریت کا اہم اصول ہے۔ انہوں نے اپنے خطاب میں کہا کہ “جمہوریت میں ہار کے بعد شکست تسلیم کرنا ضروری ہے، اور یہی فرق جمہوریت اور آمریت میں ہے۔”
کملا ہیرس نے اپنی انتخابی مہم میں شامل ہونے والوں کا شکریہ ادا کرتے ہوئے کہا کہ ان کی کوشش رہی ہے کہ عوام کو متحد کیا جائے اور امریکہ کے بہتر مستقبل کے لیے ایک مضبوط پیغام دیا جائے۔ ان کا کہنا تھا کہ انتخابی مہم میں کامیاب نہ ہونے کے باوجود ان کا عزم امریکی عوام کے لیے محفوظ اور بہتر مستقبل کے لیے قائم رہے گا۔
اپنے خطاب میں کملا ہیرس نے گن وائلنس کے حوالے سے بھی بات کی اور کہا کہ وہ اس مسئلے پر اپنی جنگ جاری رکھیں گی اور اپنے شہریوں کو محفوظ رکھنے کی کوششوں میں ہار نہیں مانیں گی۔ انہوں نے کہا کہ “ہماری لڑائی امریکی عوام کے بہتر مستقبل کے لیے ہے، اور ستارے اندھیرے میں ہی روشن ہوتے ہیں۔”
امریکی صدارتی انتخابات میں ڈونلڈ ٹرمپ نے کامیابی حاصل کی ہے اور وہ امریکہ کے 47ویں صدر منتخب ہوئے ہیں۔ اس انتخابی مقابلے میں ٹرمپ نے 538 الیکٹورل ووٹوں میں سے 295 ووٹ حاصل کیے، جبکہ کملا ہیرس نے 226 ووٹوں کے ساتھ انتخابی مہم کا اختتام کیا۔
کملا ہیرس کا یہ موقف امریکی جمہوریت کے اصولوں کی اہمیت کو اجاگر کرتا ہے، جہاں شکست تسلیم کرنا ایک جمہوری عمل کا حصہ ہے۔
