چین نے نومنتخب امریکی صدر ڈونلڈ ٹرمپ کو ایک بار پھر امریکی صدر منتخب ہونے پر مبارکباد دی ہے۔ چینی وزارتِ خارجہ کے ترجمان نے اس بات کا اعادہ کیا کہ چین امریکا کے ساتھ باہمی احترام کی بنیاد پر کام جاری رکھے گا، اور دونوں ممالک کے درمیان تعلقات کو مزید مستحکم کرنے کے لیے چین کی جانب سے کسی بھی پالیسی میں تبدیلی نہیں کی جائے گی۔
چینی وزارتِ خارجہ کے ترجمان نے کہا کہ چین امریکی عوام کے انتخاب کا احترام کرتا ہے اور ہمیشہ کی طرح امریکی حکومت کے ساتھ تعاون کے لیے تیار ہے۔ ان کے مطابق چین کی امریکا کے بارے میں پالیسی مستحکم اور واضح ہے، اور اس میں کسی قسم کی تبدیلی کی توقع نہیں ہے۔
یہ بیان اس وقت سامنے آیا ہے جب ڈونلڈ ٹرمپ نے امریکی صدارتی انتخابات میں کامیابی حاصل کی اور وہ امریکا کے 47 ویں صدر منتخب ہوئے ہیں۔ ٹرمپ کی دوسری مدت کے آغاز کے موقع پر چینی حکومت نے انہیں مبارکباد دی اور دونوں ممالک کے تعلقات کو مزید مضبوط کرنے کے عزم کا اظہار کیا۔
امریکی صدارتی انتخاب میں ٹرمپ نے 538 میں سے 277 الیکٹورل ووٹ حاصل کیے، جبکہ ان کی حریف کملا ہیرس کو 226 ووٹ ملے۔ کسی بھی امیدوار کو جیت کے لیے کم از کم 270 الیکٹورل ووٹ درکار ہوتے ہیں، اور ٹرمپ نے یہ ہدف پورا کر کے دوسری بار صدر منتخب ہونے کا اعزاز حاصل کیا۔
