نو منتخب امریکی صدر ڈونلڈ ٹرمپ نے اپنی انتخابی کامیابی کے بعد اسپیس ایکس کے بانی ایلون مسک کو “نیا ستارہ” قرار دیتے ہوئے ان کی ستائش کی۔ فلوریڈا میں عوامی خطاب کرتے ہوئے ٹرمپ نے ایلون مسک کی صدارتی مہم کے لیے فراہم کردہ مالی تعاون اور مہم کے دوران ان کی سرگرمیوں کی تعریف کی۔
ٹرمپ نے کہا کہ “آج کی رات ہمارے درمیان ایک نیا ستارہ موجود ہے، وہ ایک نیا ستارہ ہے جسے ایلون مسک نے جنم دیا ہے۔” انہوں نے مزید کہا کہ ایلون مسک ایک شاندار شخصیت ہیں، جنہوں نے فلاڈیلفیا اور پنسلوانیا جیسے سوئنگ ریاستوں میں دو ہفتے تک مہم چلائی۔
ایلون مسک، جو دنیا کی امیر ترین شخصیات میں شمار ہوتے ہیں، نے ٹرمپ کی 2024ء کی صدارتی مہم کے لیے تقریباً 132 ملین ڈالرز عطیہ کیے ہیں۔ اس کے علاوہ، ایلون مسک نے خود بھی ٹرمپ کی انتخابی مہم میں بھرپور حصہ لیا اور اس کی سرگرمیوں میں فعال طور پر شامل ہوئے۔ ٹرمپ نے اپنے خطاب میں اس مالی تعاون اور ان کی کوششوں کو سراہا۔
ایلون مسک نے ٹرمپ کی کامیابی پر خوشی کا اظہار کرتے ہوئے ایکس (سابقہ ٹویٹر) پر پوسٹ کی کہ ان کی جیت “کرسٹل کلیئر” تھی۔
امریکی صدارتی انتخابات میں ڈونلڈ ٹرمپ نے 538 میں سے 277 الیکٹورل ووٹ حاصل کرکے کامیابی حاصل کی، جب کہ ان کی حریف کملا ہیرس کو 226 ووٹ ملے۔ ٹرمپ کی یہ جیت امریکہ کے 47ویں صدر کی حیثیت سے ان کی دوسری مدت کا آغاز کرتی ہے۔
ٹرمپ اور مسک کے درمیان اس کامیاب شراکت داری نے امریکی سیاسی منظرنامے پر ایک نیا باب رقم کیا ہے، اور یہ انتخابی مہم کے دوران دونوں کی اسٹرٹیجک کوششوں کا نتیجہ ہے۔
