بھارت کی ریاست تامل ناڈو کے ایک گاؤں تلاسین دھراپرم میں امریکی صدارتی انتخابات کے حوالے سے خصوصی دعاؤں کا اہتمام کیا جا رہا ہے، جہاں مقامی افراد امریکی نائب صدر اور ڈیموکریٹک پارٹی کی امیدوار کملا ہیرس کی کامیابی کے لیے دعائیں مانگ رہے ہیں۔ یہ گاؤں، ریاست کے دارالحکومت چنئی سے تقریباً 300 کلومیٹر دور واقع ہے اور کملا ہیرس کا ننھیال بھی یہیں ہے۔ کملا ہیرس کی والدہ کا تعلق بھارتی نژاد خاندان سے ہے، اور وہ چنئی میں پیدا ہوئیں، جبکہ ان کے والد جمیکا سے تھے اور بعد میں امریکا منتقل ہوئے۔
تلاسین دھراپرم کے لوگوں کے لیے کملا ہیرس کی کامیابی فخر کا باعث ہوگی، کیونکہ وہ انہیں ایک بھارتی نژاد شخصیت کے طور پر دیکھتے ہیں۔ گاؤں کے لوگ مقامی مندر میں کملا ہیرس کی جیت کے لیے دعائیں کر رہے ہیں، تاکہ ان کا نام دنیا بھر میں روشن ہو سکے۔ یہاں کے باشندوں کا کہنا ہے کہ وہ کملا ہیرس کو امریکی صدر کے طور پر دیکھنا چاہتے ہیں اور ان کی جیت ان کے لیے ایک تاریخی موقع ہوگا۔
اس سے قبل بھی جب کملا ہیرس کو ڈیموکریٹ پارٹی کی طرف سے نائب صدر کے لیے منتخب کیا گیا تھا، گاؤں کے لوگوں نے ان کے اعزاز میں ایک بڑا بینر لگایا تھا، جس پر ان کے لیے نیک خواہشات کا اظہار کیا گیا تھا۔ گاؤں والوں کے مطابق کملا ہیرس ان کے علاقے کی قابل فخر بیٹی ہیں۔
آج کے امریکی صدارتی انتخابات میں کملا ہیرس اور ریپبلکن امیدوار ڈونلڈ ٹرمپ کے درمیان سخت مقابلے کی توقع ہے۔ اس اہم انتخاب میں کسی بھی امیدوار کو جیتنے کے لیے 538 الیکٹورل ووٹوں میں سے کم از کم 270 ووٹ حاصل کرنا ہوں گے۔
