انٹرنیشنل کرکٹ کونسل (آئی سی سی) نے تازہ ترین ٹیسٹ پلیئرز کی رینکنگ جاری کر دی ہے جس میں کئی پاکستانی کھلاڑیوں کی کارکردگی میں نمایاں بہتری دیکھنے کو ملی ہے۔ پاکستان کے بیٹر سعود شکیل نے شاندار ترقی کرتے ہوئے بیٹنگ رینکنگ میں ٹاپ ٹین میں جگہ بنا لی ہے۔ سعود شکیل نے 20 درجے ترقی کے بعد 7ویں نمبر پر پہنچ کر اپنی کارکردگی کا لوہا منوایا، جبکہ نیوزی لینڈ کے راچن رویندرا 8 درجے بڑھ کر 10ویں پوزیشن پر آ گئے ہیں۔
ٹیسٹ بیٹرز کی فہرست میں انگلینڈ کے جو روٹ اپنی پہلی پوزیشن برقرار رکھے ہوئے ہیں، جب کہ نیوزی لینڈ کے کین ولیمسن بدستور دوسرے نمبر پر موجود ہیں۔ بھارت کے نوجوان کھلاڑی جیسوال نے بھی ایک درجہ بہتری کے بعد تیسری پوزیشن حاصل کر لی ہے، جبکہ بھارت کے ویرات کوہلی کی رینکنگ میں 6 درجے کمی ہوئی ہے اور وہ 14 ویں نمبر پر چلے گئے ہیں۔ اس کے علاوہ، پاکستان کے بابر اعظم بھی ایک درجہ بہتری کے بعد 18ویں نمبر پر پہنچ گئے ہیں۔
ٹیسٹ بولرز کی رینکنگ میں اس بار تبدیلیاں نمایاں ہیں۔ بھارت کے جسپریت بمرا کی پہلی پوزیشن ختم ہو چکی ہے، اور جنوبی افریقہ کے کگیسو ربادا نے 3 درجے ترقی کے بعد نمبر ون بولر کی جگہ حاصل کر لی ہے۔ آسٹریلیا کے جوش ہیزل ووڈ ایک درجہ اوپر آ کر دوسرے نمبر پر پہنچ گئے ہیں، جب کہ جسپریت بمرا تنزلی کے بعد تیسرے نمبر پر آ گئے ہیں۔ بھارت کے اسپنر روی چندرن ایشون دو درجے نیچے ہو کر چوتھے نمبر پر آ گئے ہیں۔
پاکستان کے بولرز میں نعمان علی نے متاثر کن کارکردگی کے باعث 8 درجے ترقی کے ساتھ 9ویں پوزیشن پر قبضہ جما لیا ہے، جس سے وہ بھی ٹاپ ٹین میں شامل ہو گئے ہیں۔ پاکستان کے ایک اور بولر ساجد خان نے بھی اچھی کارکردگی کا مظاہرہ کرتے ہوئے 12 درجے ترقی کی اور اب وہ 38 ویں نمبر پر پہنچ گئے ہیں۔
آل راؤنڈرز کی فہرست میں بھارت کے رویندرا جڈیجا کی پہلی پوزیشن برقرار ہے۔ اس رینکنگ میں نئی تبدیلیوں نے ٹیسٹ کرکٹ کے منظرنامے کو مزید دلچسپ بنا دیا ہے، خاص طور پر پاکستانی کھلاڑیوں کی بہتری سے ان کے مداحوں میں جوش و خروش بڑھ گیا ہے۔
