فلوریڈا کے ویسٹ پام بیچ میں ٹرمپ گالف کلب کے قریب فائرنگ کے واقعے کے بعد سابق امریکی صدر ڈونلڈ ٹرمپ کا بیان سامنے آیا ہے۔
امریکی میڈیا کے مطابق، اتوار کو ٹرمپ گالف کلب کے قریب فائرنگ ہوئی، جہاں ڈونلڈ ٹرمپ گالف کھیل رہے تھے۔ غیر ملکی خبر رساں ایجنسیوں کے مطابق، ٹرمپ فائرنگ سے محفوظ رہے۔
ایف بی آئی نے اس واقعے کو ٹرمپ کے قتل کی کوشش قرار دیا ہے۔ پام بیچ کے قانون نافذ کرنے والے اہلکاروں کا کہنا ہے کہ ٹرمپ حملہ آور سے 400 سے 500 گز کے فاصلے پر تھے۔ حکام نے AK-47 قسم کا ہتھیار برآمد کیا، اور سیکریٹ سروس نے حفاظتی اقدامات کے تحت فائرنگ کی۔
امریکی میڈیا کے مطابق، گالف کلب میں فائرنگ کرنے والے کی شناخت ریان ویسلے کے نام سے ہوئی ہے۔
فائرنگ کے واقعے کے بعد ٹرمپ نے بیان دیا ہے کہ وہ محفوظ اور بالکل ٹھیک ہیں۔ انہوں نے کہا کہ ایسے واقعات ان کے حوصلے کو پست نہیں کر سکتے اور وہ کسی صورت ہتھیار نہیں ڈالیں گے۔
یاد رہے کہ جولائی میں بھی ٹرمپ پر انتخابی ریلی کے دوران فائرنگ ہوئی تھی، جس میں وہ زخمی ہوئے اور ایک شخص ہلاک ہوا تھا۔ فرانسیسی خبر رساں ایجنسی کے مطابق، ٹرمپ پنسلوینیا کے بٹلر میں ریلی کے دوران اسٹیج پر موجود تھے، اور گولی بظاہر ان کے کان کو چھوتی ہوئی نکل گئی۔ فائرنگ کے بعد سیکیورٹی اہلکاروں کی کارروائی میں حملہ آور بھی ہلاک ہو گیا تھا۔
