سابق امریکی صدر اور ری پبلکن صدارتی امیدوار ڈونلڈ ٹرمپ پر قاتلانہ حملے کی کوشش کرنے والا ملزم گرفتار کر لیا گیا ہے۔
غیر ملکی خبر ایجنسی کے مطابق، حملہ آور کو فلوریڈا کے مارٹن کاؤنٹی سے پکڑا گیا۔ پولیس کے مطابق، مشتبہ شخص نے گالف کورس میں فائرنگ کی اور پھر رائفل چھوڑ کر فرار ہو گیا، لیکن پولیس نے اسے مارٹن کاؤنٹی میں گرفتار کر لیا۔ ملزم کے فرار کے دوران دو بیگ، رائفل، اور کیمرا بھی چھوڑ گیا تھا۔
غیر ملکی میڈیا کے مطابق، گرفتار شدہ 58 سالہ ملزم ریان ویسلے روتھ ہے، جو ایک چھوٹی تعمیراتی کمپنی کا مالک ہے۔ ریان کا کوئی فوجی پس منظر نہیں، مگر اس نے ماضی میں اپنی سوشل میڈیا پوسٹوں میں یوکرین کی جنگ میں حصہ لینے کی خواہش کا اظہار کیا تھا۔
رپورٹس کے مطابق، 2023 میں نیو یارک ٹائمز سے بات کرتے ہوئے ریان نے کہا تھا کہ وہ یوکرین جنگ کے آغاز کے بعد وہاں گیا تھا تاکہ افغان فائٹرز کو بھرتی کر سکے اور یوکرین کو اس کے لیے رضامند کر سکے۔
یہ بھی بتایا گیا ہے کہ 2002 میں ریان نے خود کو آٹومیٹک ہتھیاروں سے لیس کر کے ایک عمارت میں بند کر لیا تھا۔
دوسری جانب، حملے کے بعد ردعمل دیتے ہوئے ٹرمپ نے کہا کہ وہ محفوظ ہیں اور کبھی ہار نہیں مانیں گے۔
یاد رہے کہ گزشتہ روز فلوریڈا کے ویسٹ پام بیچ میں واقع ٹرمپ کے گالف کلب کے قریب فائرنگ کا واقعہ پیش آیا تھا، جب سابق صدر وہاں گالف کھیل رہے تھے۔ اس سے قبل جولائی میں ایک انتخابی ریلی کے دوران بھی ان پر قاتلانہ حملہ ہوا تھا، جس میں وہ زخمی ہو گئے تھے
