ایشین ہاکی چیمپئنز ٹرافی میں بھارت نے پاکستان کو ایک سنسنی خیز مقابلے کے بعد شکست دے دی۔
چین میں جاری ٹورنامنٹ میں پاکستان اور بھارت کی ٹیموں کے درمیان دلچسپ میچ دیکھنے کو ملا۔ میچ کے چھٹے منٹ میں احمد ندیم نے پاکستان کو برتری دلائی، مگر 12ویں منٹ میں بھارت کو پنالٹی کارنر ملا، جس پر کپتان ہرمیت پریت سنگھ نے گول کرکے کھیل برابر کر دیا۔
دوسرے کوارٹر میں بھارت نے دوبارہ پنالٹی کارنر حاصل کیا اور ایک اور گول کرکے پاکستان کے خلاف برتری حاصل کی۔ ہاف ٹائم تک بھارت 2-1 کی سبقت پر تھا۔
تیسرے کوارٹر میں پاکستان نے شاندار کھیل پیش کیا، بھارتی ہاف میں زیادہ وقت گزارا، لیکن 5 پنالٹی کارنر ہونے کے باوجود کوئی گول نہ کر سکا۔ پاکستان کو دو بار 10 کھلاڑیوں کے ساتھ کھیلنا پڑا، ایک بار سفیان کو 5 منٹ کے لیے باہر جانا پڑا اور آخری کوارٹر میں رانا وحید کو 10 منٹ کے لیے باہر کیا گیا۔
آخری کوارٹر میں دونوں ٹیموں نے گول کرنے کی بھرپور کوشش کی، مگر کوئی بھی ٹیم کامیاب نہ ہوئی اور بھارت نے پاکستان کو 2-1 سے شکست دی۔
یہ بھارت کی ایونٹ میں مسلسل پانچویں جیت تھی، جبکہ پاکستان کی یہ پہلی شکست تھی۔ دونوں ٹیمیں سیمی فائنل کے لیے پہلے ہی کوالیفائی کر چکی ہیں۔
