غزہ: المواسی کیمپ پر اسرائیلی بمباری میں مزید 40 فلسطینی شہید
غزہ کے المواسی کیمپ پر اسرائیلی فوج کی حالیہ بمباری میں مزید 40 فلسطینی شہید ہوگئے، جبکہ 60 دیگر زخمی ہوئے ہیں۔ غیر ملکی میڈیا رپورٹس کے مطابق، اسرائیلی فوج نے خیمہ بستی کو نشانہ بنایا، جس کے نتیجے میں بمباری سے 30 فٹ گہرے گڑھے پڑ گئے، جس کی وجہ سے لاشوں کی تلاش میں مشکلات پیش آ رہی ہیں۔
اس دوران، اسرائیلی فوج نے شمالی غزہ میں پولیو مہم کے لیے جانے والے یو این عملے کو حراست میں لے لیا اور ان کی گاڑیوں کو بلڈوزروں سے نقصان پہنچایا۔
نابلوس کے تین دیہات میں اسرائیلی قبضے کے لیے فلسطینیوں کو جگہ خالی کرنے کے احکامات بھی جاری کیے گئے ہیں۔
7 اکتوبر 2023 کے بعد سے غزہ میں اسرائیلی حملوں میں ہزاروں بچے شہید ہو چکے ہیں، اور فلسطینی شہداء کی تعداد 40,972 سے تجاوز کر چکی ہے، جبکہ 94,761 سے زائد فلسطینی زخمی ہیں۔ حملوں میں شہید اور زخمی ہونے والوں کی نصف سے زائد تعداد بچوں اور خواتین پر مشتمل ہے، اور اسرائیلی بمباری کے باعث لاکھوں افراد بے گھر ہوکر کیمپوں میں پناہ لینے پر مجبور ہیں۔
