پاکستانی سمندر میں تیل و گیس کے بڑے ذخائر کی دریافت کے بارے میں پیٹرولیم ڈویژن کے ذرائع نے کہا ہے کہ یہ خبر صرف ایک اندازہ یا تخمینہ ہو سکتی ہے۔
میڈیا اور سوشل میڈیا پر گردش کرنے والی خبروں کے مطابق، سمندر سے تیل اور گیس کا بڑا ذخیرہ دریافت ہوا ہے، جسے دنیا کا چوتھا سب سے بڑا ذخیرہ قرار دیا جا رہا ہے۔ یہ دریافت تین سال کے سروے کے بعد سامنے آئی ہے۔
پیٹرولیم ڈویژن کے ذرائع نے وضاحت کی کہ سمندر میں تیل و گیس کی تلاش کے لیے جیولوجیکل سروے کیا گیا ہے اور سروے کے دوران جمع کیے گئے ڈیٹا کا تجزیہ کیا جا رہا ہے۔
ذرائع نے بتایا کہ تیل و گیس کے ذخائر کی دریافت کے بارے میں کوئی حتمی معلومات فراہم کرنا قبل از وقت ہے، اور موجودہ معلومات صرف ایک تخمینہ ہو سکتی ہیں۔
پیٹرولیم ڈویژن کے مطابق، ڈی جی پیٹرولیم کنسیشنز آفس اگلے سال کی پہلی سہ ماہی میں بڈنگ کرائے گا، اور کامیاب بولی دہندگان کو آف شور بلاکس ایوارڈ کیے جائیں گے۔ تیل و گیس کی دریافت کی تصدیق ایکسپلوریشن کے عمل کے بعد ہی ہو سکے گی۔
ذرائع نے مزید بتایا کہ پاکستان میں ماضی میں بھی سمندر میں تیل و گیس کی تلاش کی گئی ہے اور ان تلاشوں کی بنیاد بھی تخمینوں پر تھی۔ جب تک گیس یا تیل کی تصدیق نہ ہو جائے، ذخیرے کے حجم کا اندازہ نہیں لگایا جا سکتا۔
