سمندری ماہرین نے سمندر کے اندر 3,109 میٹر بلند ایک عظیم پہاڑ دریافت کیا ہے۔
نیو یارک پوسٹ کی رپورٹ کے مطابق، کیلیفورنیا کے شمٹ اوشین انسٹی ٹیوٹ کے محققین نے چلی کے ساحل سے تقریباً 1,448 کلومیٹر دور بحر الکاہل میں یہ پہاڑ پایا ہے، جو یونان کے ماؤنٹ اولمپس (2,917 میٹر) سے بھی اونچا ہے۔
یہ پہاڑ ایک پہاڑی سلسلے کا حصہ ہے جو سمندر کی گہرائیوں میں واقع ہے اور یہاں قدیم مرجان اور نایاب سمندری انواع موجود ہیں۔
یہ دریافت شمٹ اوشین انسٹی ٹیوٹ کی 28 روزہ مہم کے دوران ہوئی، جس کی قیادت تحقیقاتی جہاز آر وی فالکور (ٹو) پر کی گئی۔ محققین نے پہاڑ کا تفصیلی نقشہ تیار کرنے کے لیے جہاز کے نیچے سونر سسٹم کا استعمال کیا۔
شمٹ اوشین انسٹی ٹیوٹ کی ایگزیکٹیو ڈائریکٹر، جیوتیکا ویرمانی کے مطابق، سونر سسٹم کی مدد سے آواز کی لہریں نیچے جا کر واپس آتی ہیں، جس سے سمندری فرش کا تفصیلی نقشہ بنایا جا سکتا ہے۔
یہ دریافت اہمیت رکھتی ہے کیونکہ ابھی تک سمندری فرش کا صرف 26 فیصد نقشہ تیار کیا گیا ہے، حالانکہ سمندری فرش زمین کی سطح کا 71 فیصد حصّہ ہے۔
ماہرین کا اندازہ ہے کہ دنیا بھر میں کم از کم 1 لاکھ سمندری پہاڑ ہیں جو 1,000 میٹر سے اونچے ہیں اور مختلف آبی حیات کا مسکن ہیں۔
