وفاقی وزیر عبدالعلیم خان نے کہا کہ جیمز اور اسٹونز سے متعلق تمام اداروں کو فعال اور مؤثر بنانا ضروری ہے۔
عبدالعلیم خان کی زیرِ صدارت وزیرِ اعظم کی اسٹیرنگ کمیٹی برائے جیمز اور اسٹونز کے اجلاس میں، نجی شعبے کی مشاورت سے قیمتی پتھروں کے مسائل کی ترجیحی فہرست تیار کی گئی۔
اجلاس میں قیمتی پتھروں کے لیے لاجسٹک، کوریئر سروسز اور پاکستانی سفارت خانوں سے مارکیٹنگ کی تجاویز پر بھی بات چیت ہوئی۔
جیمز اور اسٹونز کے شعبے میں بہتری کے لیے بھارت اور دیگر ممالک سے تقابلی جائزہ لیا گیا۔
چیئرمین اسٹیرنگ کمیٹی عبدالعلیم خان نے کہا کہ متعلقہ ادارے مل کر جیمز اور اسٹونز کے لیے متفقہ پالیسی تیار کریں اور سب کمیٹی قائم کرنے کی ہدایت دی۔
وفاقی وزیر پٹرولیم مصدق ملک نے بھی جیمز اور اسٹونز کو ریگولیٹ کرنے اور شفافیت لانے کی ضرورت پر زور دیا۔
عبدالعلیم خان نے کہا کہ جیمز اور اسٹونز کو صنعت کا درجہ دے کر لاکھوں ڈالرز کمائے جا سکتے ہیں اور اس شعبے کی ری اسٹرکچرنگ بہت اہم ہے۔ انہوں نے کہا کہ وزیرِ اعظم آئندہ 6 ماہ میں اس شعبے میں واضح پیش رفت چاہتے ہیں اور متفقہ ایجنڈے کے ساتھ آگے بڑھنے کی ضرورت ہے۔
انہوں نے یہ بھی کہا کہ جیمز اور اسٹونز کے کاروباری افراد کو حکومتی سطح پر مدد فراہم کی جائے گی اور پرائیویٹ سیکٹر بھی اگلے 2 دن میں سفارشات کو حتمی شکل دے۔
