ترک صدر رجب طیب اردوان اور سعودی ولی عہد شہزادہ محمد بن سلمان نے اسرائیلی حملوں اور انسانی حقوق کی خلاف ورزیوں کے فوری خاتمے اور پائیدار جنگ بندی پر زور دیا ہے۔
ترک صدارتی دفتر کے مطابق، صدر اردوان اور سعودی ولی عہد کے درمیان ٹیلیفونک گفتگو میں اردوان نے غزہ کی صورتحال پر تبادلہ خیال کیا۔ دونوں رہنماؤں نے مسئلہ فلسطین کے حل کے لیے اسلامی ممالک کی مشترکہ کوششوں پر بھی بات کی۔
سعودی ولی عہد نے مصر کے صدر عبدالفتاح السیسی کو بھی فون کیا، اور دونوں نے غزہ میں فوری جنگ بندی اور مغربی کنارے میں اسرائیلی آپریشن روکنے کا مطالبہ کیا۔
سعودی خبر ایجنسی کے مطابق، محمد بن سلمان نے فلسطینیوں کے خلاف اسرائیلی جارحیت روکنے کے لیے عرب اور اسلامی ممالک کی کوششوں پر زور دیا۔ مصری صدارتی دفتر نے بھی کہا کہ دونوں رہنماؤں نے خطے کی بڑھتی کشیدگی اور استحکام کے لیے اسرائیلی حملوں کے خاتمے کی ضرورت پر تبادلہ خیال کیا۔
