راولپنڈی میں جاری دوسرے ٹیسٹ کے چوتھے دن کا آغاز پاکستان نے 21 رنز کی برتری کے ساتھ دو وکٹوں کے نقصان پر کیا۔
پاکستان کی آدھی ٹیم صرف 65 رنز پر آؤٹ ہو گئی، صائم ایوب 20، شان مسعود 28، اور بابر اعظم 11 رنز بنا کر پویلین واپس چلے گئے۔ اس وقت سعود شکیل اور محمد رضوان کریز پر موجود ہیں۔
تیسرے دن، پاکستان کی دو وکٹیں چوتھے اوور میں گر گئیں، عبد اللہ شفیق 3 اور خرم شہزاد بغیر رن بنائے آؤٹ ہوئے۔ پہلے گھنٹے میں پاکستانی بولرز نے 6 بنگلادیشی کھلاڑیوں کو پویلین بھیج دیا، لیکن لٹن داس کے 138 اور مہدی حسن کے 78 رنز کی بدولت بنگلادیش نے پہلی اننگز میں 262 رنز بنا لیے اور 12 رنز کے خسارے میں رہی۔
دونوں بیٹرز نے ساتویں وکٹ پر 165 رنز کی شراکت قائم کی۔ پاکستان کی طرف سے خرم شہزاد نے 6، میر حمزہ اور سلمان علی آغا نے 2، 2 کھلاڑیوں کو آؤٹ کیا۔
بنگلادیشی بیٹر لٹن داس نے کہا کہ دوسرے ٹیسٹ کی وکٹ بیٹنگ کے لیے سازگار نہیں ہے، ابتدائی طور پر 26 رنز پر 6 کھلاڑی آؤٹ ہونے پر دباؤ تھا، لیکن مہدی حسن نے مثبت سوچ کے ساتھ بیٹنگ کی اور پاکستانی بولنگ لائن کا دباؤ کم کیا۔
