سینئر وزیر پنجاب مریم اورنگزیب نے بجلی کے بلوں میں ریلیف کے حوالے سے تفصیلات جاری کرتے ہوئے کہا ہے کہ 201 سے 500 یونٹ تک بجلی استعمال کرنے والے صارفین کو فی یونٹ 14 روپے کی کمی کا ریلیف ملنا شروع ہو گیا ہے۔ یہ ریلیف لاہور، ملتان، فیصل آباد، گوجرانوالہ، اور اسلام آباد کی بجلی کمپنیوں کے صارفین کو دیا گیا ہے۔
انہوں نے بتایا کہ مجموعی طور پر 35 لاکھ 16 ہزار 877 صارفین کو ریلیف فراہم کیا گیا ہے، جس میں لاہور الیکٹرک سپلائی کارپوریشن کے 8 لاکھ 40 ہزار صارفین شامل ہیں۔
مریم اورنگزیب نے کہا کہ ملتان الیکٹرک سپلائی کارپوریشن کے 6 لاکھ 53 ہزار 883، فیصل آباد کے 5 لاکھ 6 ہزار 139، گوجرانوالہ کے 7 لاکھ 31 ہزار 305، اور اسلام آباد کے 7 لاکھ 85 ہزار 550 صارفین کو بھی ریلیف دیا گیا ہے۔
انہوں نے مزید کہا کہ وزیرِ اعظم شہباز شریف نے ایک سے 200 یونٹ والے بجلی صارفین کو 50 ارب روپے کا ریلیف فراہم کیا ہے۔ صوبائی وزیر نے کہا کہ وزیرِ اعلیٰ پنجاب مریم نواز نے مشکل معاشی حالات میں بھی ناممکن کو ممکن بنایا ہے اور عوام کو مزید ریلیف فراہم کیا جائے گا۔
