پشاور ایئرپورٹ پر منکی پاکس کے دو مشتبہ کیسز میں سے ایک کا ٹیسٹ مثبت آیا ہے۔
وزارت صحت کے ترجمان کے مطابق، پشاور کے باچا خان ایئرپورٹ پر اسکریننگ کے دوران دونوں مسافروں میں منکی پاکس کی علامات پائی گئیں، جس کے بعد انہیں بارڈر ہیلتھ سروسز کے عملے نے فوری طور پر آئسولیٹ کر دیا۔
ترجمان نے بتایا کہ دونوں افراد کے نمونے خیبر میڈیکل یونیورسٹی کے پشاور ریفرنس پبلک لیبارٹری کو بھیجے گئے تھے، جہاں ایک کیس کا نتیجہ مثبت آیا ہے۔
ترجمان کے مطابق، منکی پاکس کا مثبت ٹیسٹ آنے والا شخص پشاور کا رہائشی ہے اور اس کی سفر کی ہسٹری خلیجی ممالک کی ہے۔ اس شخص کے کانٹیکٹ ٹریسنگ کی اسکریننگ بھی کی جا رہی ہے۔
ترجمان نے مزید بتایا کہ حالیہ ایمرجنسی کے بعد خیبر پختونخوا میں منکی پاکس کے کیسز کی تعداد تین ہو گئی ہے۔
اس حوالے سے صحت کے کوآرڈینیٹر ڈاکٹر مختار کا کہنا ہے کہ حکومت پاکستان نے عوام کو منکی پاکس سے محفوظ رکھنے کے لیے مؤثر حکمت عملی اپنائی ہے اور تمام ایئرپورٹس پر بارڈر ہیلتھ سروسز کا اسٹاف مستعدی سے کام کر رہا ہے۔
