لاہور کی جوڈیشل مجسٹریٹ کی عدالت نے برطانیہ میں جھوٹی خبروں سے فسادات کے کیس میں گرفتار ملزم فرحان آصف کو بری کر دیا۔
سماعت کے دوران تفتیشی افسر نے عدالت کو بتایا کہ فرحان آصف کے شیئر کرنے سے پہلے ہی یہ فیک نیوز پھیل چکی تھی۔
تفتیشی افسر کے مطابق ہر ممکن تحقیقات کی گئیں لیکن ملزم کے خلاف کوئی ثبوت نہیں ملا۔
عدالت نے استفسار کیا کہ ملزم نے یہ خبر کس کے ساتھ شیئر کی اور کب اسے ڈیلیٹ کیا، جس پر فرحان آصف نے بتایا کہ اس نے 6 گھنٹے بعد خبر کو ڈیلیٹ کر دیا تھا۔
بعد ازاں عدالت نے ملزم فرحان آصف کی استدعا قبول کرتے ہوئے اسے بری کر دیا۔
واضح رہے کہ لاہور پولیس نے برطانیہ میں ہنگاموں کا باعث بننے والی جھوٹی خبر پھیلانے کے الزام میں فرحان آصف کو گرفتار کیا تھا اور بعد میں اسے ایف آئی اے کے حوالے کر دیا گیا تھا۔
اس فیک نیوز میں دعویٰ کیا گیا تھا کہ برطانوی شہر ساوتھ پورٹ میں 3 بچیوں کو ہلاک کرنے والا شخص ایک مسلمان تارک وطن ہے، جبکہ حقیقت میں اس واقعے کے 17 سالہ ملزم کا تعلق روانڈا سے تھا۔
