پاکستان اور بنگلادیش کے درمیان کھیلے جا رہے پہلے ٹیسٹ کے تیسرے دن کی ابتدا ہو گئی ہے اور بنگلادیش کی بیٹنگ جاری ہے۔
بنگلادیش کی دوسری وکٹ 53 رنز پر گری، جب نجم الحسین شنٹو 16 رنز بنا کر آؤٹ ہوئے، ان کی وکٹ خرم شہزاد نے لی۔ اس سے پہلے ذاکر حسن 12 رنز بنا کر نسیم شاہ کے ہاتھوں آؤٹ ہوئے، ان کا کیچ وکٹس کے پیچھے محمد رضوان نے لیا۔
دوسرے دن کھیل کے اختتام پر بنگلادیش نے پاکستان کے 448 رنز کے جواب میں 27 رنز بنائے تھے۔
دوسرے دن کی تفصیلات:
پنڈی اسٹیڈیم میں پاکستان نے دوسرے دن کھیل کا آغاز 4 وکٹوں کے نقصان پر 158 رنز سے کیا۔ محمد رضوان اور سعود شکیل نے شاندار بیٹنگ کا مظاہرہ کیا، دونوں نے اپنے کیریئر کی تیسری سنچریاں اسکور کیں۔ سعود شکیل نے 141 رنز بنائے جبکہ محمد رضوان 171 رنز بنا کر ناٹ آؤٹ رہے۔
اس کے علاوہ، صائم ایوب نے 56 رنز بنائے، عبد اللہ شفیق 2، کپتان شان مسعود 6، بابر اعظم صفر، اور سلمان علی آغا نے 19 رنز بنائے۔ شاہین شاہ آفریدی نے 29 رنز بنائے اور ناقابل شکست رہے۔
پاکستان نے 141 اوورز کھیل کر 6 وکٹوں کے نقصان پر 448 رنز بنا کر اننگز ڈکلیئر کر دی۔ بنگلادیش کی جانب سے شریفل اور حسن محمود نے 2، 2 وکٹیں حاصل کیں۔
مہمان ٹیم نے دوسرے دن کے اختتام تک بغیر کسی نقصان کے 27 رنز بنائے۔
پہلا دن:
پہلے دن بنگلادیش نے ٹاس جیت کر بولنگ کا فیصلہ کیا اور نئی گیند کا فائدہ اٹھاتے ہوئے پاکستان کے ابتدائی 3 کھلاڑیوں کو جلد آؤٹ کر دیا۔ تاہم، صائم ایوب اور سعود شکیل کی نصف سنچریوں نے پاکستان کی پوزیشن کو بہتر کیا۔
پاکستان کی پہلی وکٹ 3 رنز کے مجموعے پر گری جب عبد اللہ شفیق 2 رنز بنا کر آؤٹ ہوئے، دوسری وکٹ 14 رنز پر کپتان شان مسعود کی گری جو 6 رنز بنا کر آؤٹ ہوئے۔ تیسری وکٹ بابراعظم کی صورت میں گری، جو 2 گیندوں کا سامنا کر کے ڈک آؤٹ ہوئے۔ اس کے بعد صائم ایوب 56 رنز بنا کر آؤٹ ہوئے۔
