اٹک میں اسکول وین پر فائرنگ سے 2 بچے ہلاک ہو گئے۔
ریسکیو حکام کے مطابق، اٹک کے علاقے ڈھیری کوٹ میں نامعلوم افراد نے اسکول وین پر فائرنگ کی، جس کے نتیجے میں 2 بچے جاں بحق ہو گئے۔
واقعے کی اطلاع ملتے ہی ریسکیو ٹیمیں فوری طور پر موقع پر پہنچ گئیں اور زخمیوں اور جاں بحق بچوں کو اسفند یار ولی اسپتال منتقل کیا۔
ریسکیو حکام نے بتایا کہ فائرنگ کے نتیجے میں 5 بچے زخمی بھی ہوئے ہیں، جن کی عمریں 5 سے 10 سال کے درمیان ہیں، اور وین کا ڈرائیور بھی زخمی ہوا ہے۔
وزیراعلیٰ پنجاب مریم نواز نے واقعے پر شدید دکھ کا اظہار کرتے ہوئے کمشنر راولپنڈی سے فوری رپورٹ طلب کر لی ہے اور زخمیوں کو بہترین طبی سہولتیں فراہم کرنے کی ہدایت کی ہے۔
صدر مملکت آصف زرداری نے بھی اسکول وین پر فائرنگ کی مذمت کی، اور کہا کہ معصوم بچوں کو نشانہ بنانا انتہائی ظالمانہ اور شرمناک فعل ہے، اور ذمے داروں کے خلاف سخت کارروائی کی جانی چاہیے۔
