اڈیالہ جیل میں بانی پی ٹی آئی عمران خان کی مبینہ سہولتکاری کے معاملے پر جیل کے مزید 6 ملازمین کو حراست میں لے لیا گیا ہے۔
ذرائع کے مطابق گرفتار کیے گئے ملازمین میں 3 خواتین شامل ہیں، جن میں ایک خاتون سوئپر، دو لیڈی وارڈنز اور سی سی ٹی وی کیمروں کی نگرانی کرنے والے تین اہلکار شامل ہیں، جن سے پوچھ گچھ جاری ہے۔
ذرائع کا کہنا ہے کہ خواتین اسٹاف جیل میں بشریٰ بی بی اور بانی پی ٹی آئی کے درمیان پیغام رسانی کا کام انجام دیتے تھے، اور حراست میں لیے گئے ملازمین کے موبائل فون بھی قبضے میں لے لیے گئے ہیں۔
ذرائع کے مطابق اڈیالہ جیل میں نگرانی کے لیے اضافی افرادی قوت تعینات کر دی گئی ہے۔
واضح رہے کہ اس سے قبل سکیورٹی اداروں نے عمران خان کی مبینہ سہولتکاری کے الزام میں اڈیالہ جیل کے ڈپٹی سپرنٹنڈنٹ محمد اکرم کو بھی حراست میں لیا تھا، جبکہ اسسٹنٹ سپرنٹنڈنٹ بلال سے بھی تفتیش کی گئی تھی۔
