بھارتی اداکارہ اور سیاستدان کنگنا رناوت نے بالی ووڈ فنکاروں کو بے وقوف اور سطحی ذہنیت کا حامل قرار دیتے ہوئے کہا ہے کہ بالی ووڈ کی پارٹیز ان کے لیے کسی صدمے سے کم نہیں ہیں۔
بھارتی میڈیا کے مطابق، کنگنا نے حال ہی میں ایک پوڈکاسٹ میں شرکت کی، جہاں انہوں نے بالی ووڈ کے فنکاروں پر کھل کر تنقید کی۔
ایک سوال کے جواب میں کنگنا نے کہا کہ بالی ووڈ میں ان کا کوئی دوست نہیں کیونکہ یہاں ہر شخص خود غرض، ناسمجھ، اور خود پسند ہے۔ انہوں نے مزید کہا کہ بالی ووڈ فنکاروں کے پاس کوئی بامقصد بات کرنے کو نہیں ہوتی، انہیں یہ بھی معلوم نہیں ہوتا کہ دنیا میں کیا ہو رہا ہے، تو ایسے لوگوں سے دوستی کرنے کا کیا فائدہ؟
جب میزبان نے کہا کہ پوری انڈسٹری ایک جیسی نہیں ہو سکتی، تو کنگنا نے جواب دیا کہ انہوں نے بالی ووڈ کو بہت قریب سے دیکھا ہے اور ان کے تجربے کے مطابق یہاں سب ایک جیسے ہیں۔
کنگنا نے مزید کہا کہ اگر بالی ووڈ کے فنکار شوٹنگ نہ کر رہے ہوں، تو ان کے پاس کوئی کام نہیں ہوتا۔ یہ لوگ دنیا کے سب سے فارغ لوگ ہیں، جو صبح اٹھ کر کچھ دیر ورزش کرتے ہیں، پھر سو جاتے ہیں، اور یہی ان کی روزمرہ کی زندگی ہوتی ہے۔
کنگنا نے بالی ووڈ فنکاروں کی گفتگو پر بھی تنقید کرتے ہوئے کہا کہ ان کی بات چیت صرف برانڈڈ بیگز یا گاڑیوں تک محدود ہوتی ہے، اور انہوں نے آج تک بالی ووڈ میں ایسا کوئی فنکار نہیں دیکھا جو برانڈڈ چیزوں کے بارے میں بات نہ کرتا ہو۔
بالی ووڈ کی پارٹیز کے حوالے سے کنگنا نے مزید کہا کہ لوگ سمجھتے ہیں کہ یہ پارٹیز بہت شاندار ہوتی ہیں، لیکن حقیقت یہ ہے کہ ان پارٹیز میں کوئی اپنی شخصیت، ذہانت، یا فن پر بات نہیں کرتا، اور ان کے لیے بالی ووڈ کی پارٹیز کسی صدمے سے کم نہیں ہیں۔
