گورنر پنجاب سلیم حیدر خان نے قومی ہیرو ارشد ندیم کو پیرس اولمپکس میں گولڈ میڈل جیتنے پر 20 لاکھ روپے کا چیک اور گاڑی کا تحفہ دیا۔
سلیم حیدر خان نے گورنر ہاؤس لاہور میں ارشد ندیم کا خیرمقدم کیا اور ان کے اعزاز میں منعقدہ تقریب میں ان کی کارکردگی کو سراہا۔
گورنر پنجاب نے کہا کہ ارشد ندیم کی کامیابی پر پوری قوم جشن منا رہی ہے، اور ملک کے ہر کونے میں ان کی کامیابی کا خیرمقدم کیا جا رہا ہے۔ انہوں نے امید ظاہر کی کہ ارشد ندیم مستقبل میں بھی مزید ریکارڈ توڑیں گے۔
اس موقع پر ارشد ندیم نے اپنے جذبات کا اظہار کرتے ہوئے کہا کہ ان شاء اللہ وہ اپنے ملک کے لیے مزید کامیابیاں حاصل کریں گے اور قوم کی دعاؤں کے لیے شکرگزار ہیں۔ انہوں نے مزید کہا کہ اللہ کا شکر ہے کہ نہ صرف ان کی بلکہ پوری پاکستانی قوم کی عزت افزائی کی گئی ہے، اور قوم کی طرف سے ملنے والی عزت کسی بھی کھلاڑی کے لیے سب سے بڑا اعزاز ہے۔
