بنگلادیش کی سابق وزیراعظم شیخ حسینہ واجد اور ان کے دور کے اہم حکومتی عہدیداروں پر ایک شہری کے قتل کے الزام میں مقدمہ درج کیا گیا ہے۔
بنگلادیشی میڈیا کے مطابق، شیخ حسینہ واجد اور دیگر 6 افراد کو 19 جولائی کو ڈھاکا میں مظاہروں کے دوران پولیس کی فائرنگ سے شہری کی ہلاکت کے مقدمے میں نامزد کیا گیا ہے۔
رپورٹس کے مطابق، مقدمہ ڈھاکا کے رہائشی اور مقتول کے قریبی شخص امیر حمزہ کی جانب سے درج کروایا گیا ہے۔
مقدمے میں درج تفصیلات کے مطابق، طلبا کے مظاہروں کے دوران پولیس کی فائرنگ سے سڑک پر گزرتے ہوئے شہری ابو سعید کی موت واقع ہوئی۔
بنگلادیشی میڈیا کے مطابق، مقدمے میں حسینہ واجد کے علاوہ عوامی لیگ کے جنرل سیکرٹری، سابق وزیر داخلہ، سابق پولیس سربراہ، تحقیقاتی ادارے کے سابق سربراہ اور نامعلوم پولیس اہلکاروں کو بھی نامزد کیا گیا ہے۔
یاد رہے کہ حالیہ دنوں طلبا کے احتجاج اور 300 سے زائد افراد کی ہلاکت کے بعد، سابق وزیراعظم شیخ حسینہ واجد نے دباؤ کے پیش نظر استعفیٰ دے کر بھارت میں پناہ لے لی تھی۔
ان کے بھارت جانے کے بعد، بنگلادیش کے آرمی چیف نے ملک کی باگ دوڑ سنبھالی اور نوبیل انعام یافتہ ڈاکٹر محمد یونس کو عبوری حکومت کا سربراہ مقرر کیا گیا۔
