پاکستانی کوہ پیما مراد سدپارہ براڈ پیک کی مہم کے دوران جاں بحق ہو گئے۔
براڈ پیک ریسکیو ٹیم نے کیمپ ون پہنچ کر مراد سدپارہ کی موت کی تصدیق کی۔ ریسکیو ٹیم کے مطابق، مراد سدپارہ کی لاش جاپانی کیمپ منتقل کر دی گئی ہے اور مزید دو کوہ پیما ہیلی کاپٹر کے ذریعے بیس کیمپ پہنچ چکے ہیں۔
آج شام دو بجے تک مراد سدپارہ کی لاش بیس کیمپ پہنچا دی جائے گی، جہاں سے آرمی ہیلی کاپٹر کے ذریعے میت اسکردو روانہ کی جائے گی۔ ریسکیو ٹیم کے چار ممبران رات ایک بجے بیس کیمپ سے روانہ ہوئے تھے۔ مراد سدپارہ ہفتے کے روز سر پر پتھر لگنے سے شدید زخمی ہوئے تھے۔
مراد سدپارہ نے کے ٹو سمیت 8 ہزار فٹ سے بلند چار پہاڑ سر کیے تھے۔ انہوں نے گزشتہ ہفتے کے ٹو کی بلندی سے ایک کوہ پیما کی لاش بھی اتاری تھی اور کے ٹو کی صفائی مہم کی قیادت کر رہے تھے۔
