پیرس اولمپکس کی اختتامی تقریب میں پاکستانی ہیرو اور گولڈ میڈلسٹ ارشد ندیم کا خصوصی ذکر کیا گیا۔
ارشد ندیم نے جیولین تھرو مقابلے میں 92.97 میٹر کی ریکارڈ تھرو کی اور پاکستان کی 77 سالہ تاریخ میں پہلی بار اکیلے سونے کا تمغہ جیتا۔
گزشتہ روز پیرس اولمپکس کا اختتام ایک شاندار تقریب کے ساتھ ہوا، جس میں فرانس کے صدر ایمانوئل میکرون اپنی اہلیہ کے ساتھ شریک ہوئے۔
اسٹیڈ ڈی فرانس میں منعقدہ تقریب میں مختلف ممالک کے ایتھلیٹس نے اپنے قومی پرچم کے ساتھ شرکت کی اور مارچ پاسٹ کیا۔ پاکستان کی نمائندگی ایتھلیٹ فائقہ ریاض نے کی۔
تقریب کے دوران کمنٹیٹرز نے ارشد ندیم کے کارنامے کو خاص طور پر سراہا۔
اختتامی تقریب میں سیکڑوں فنکاروں نے شاندار پرفارمنس دی، جس سے شائقین اور ایتھلیٹس خوب محظوظ ہوئے۔
تقریب میں ہالی وڈ اداکار ٹام کروز نے اسٹیڈیم کی چھت سے منفرد انداز میں انٹری دی اور اولمپک پرچم کے ساتھ رخصت ہوئے۔
آخر میں تھامس بیخ کے پیرس اولمپکس کے اختتام کے اعلان کے ساتھ ہی اولمپک مشعل بجھا دی گئی اور دلکش آتش بازی کے ساتھ تقریب اپنے اختتام کو پہنچی۔
